17:02, 15 - اقپان 2022 | GMT +5
كومپانيالار ءاربىر ەكىنشى پاتەردى جاسىرىن سحەما بويىنشا ساتادى
نۇر- سۇلتان. قازاقپارات – ەلدىڭ قۇرىلىس سالاسىندا ءادىل باسەكەلەستىك جوق. ءىرى كومپانيالار نارىقتا مونوپوليستكە اينالعان. ماسەلەن، ەلوردادا ءجۇرىپ جاتقان قۇرىلىستىڭ 60 پروتسەنتى ءبىر عانا حولدينگتىڭ ۇلەسىندە.
سايكەسىنشە نارىقتاعى باعانى دا وسى جەتەكشى كومپانيالار بەلگىلەيدى. باسەكەلەستىكتى قورعاۋ جانە دامىتۋ اگەنتتىگىنىڭ مالىمەتىنە قاراعاندا كەيىنگى بەس جىلدا ەلدە باسپانا باعاسىنىڭ جىلدىق يندەكسىنىڭ ءوسۋى 12 ەسە كوبەيگەن. ۇلەسكەرلەردەن قارجى تارتۋ بويىنشا دا بىلىق كوپ. ياعني ءاربىر ەكىنشى پاتەر جاسىرىن سحەما بويىنشا ساتىلادى. ءىرى كومپانيالار، قۇرىلىستى جۇرگىزبەسە دە پاتەردى ساتۋ كەزىندە برەند اتىن پايدالانادى.
بۇعان قوسا قاراپايىم حالىققا تاڭداۋ قۇقىعىن بەرمەي، ينتەرنەت، كابەلدىك تەلەديدار مەن كەلىسىم- شارت جاساپ، پاركينگ ساتىپ الۋ بويىنشا تالاپ قويادى. وسى ولقىلىقتاردىڭ ورنىن تولتىرۋ ءۇشىن اگەنتتىك ۇكىمەت وتىرىسىندا زاڭناماعا ءبىرقاتار وزگەرىس ەنگىزىپ، كەشەندى شارالار ازىرلەنەتىنىن ايتتى.
