15:12, 15 - اقپان 2022 | GMT +5
قازاقستاندا پەرزەنتحانادا سابيلەرگە كوروناۆيرۋسكە قارسى ۆاكسينا ەگىلەدى دەگەن راس پا
نۇر-سۇلتان. قازاقپارات - الەۋمەتتىك جەلىلەردە نارەستەلەردى COVID-19-عا قارسى ۆاكسيناسىز پەرزەنتحانالاردان شىعارمايتىنى تۋرالى اقپارات تارادى، دەپ حابارلايدى قازاقپارات ق ر د س م سانيتارلىق- ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتانايەۆقا سىلتەمە جاساپ.
«ءبىزدىڭ ەلىمىزدە دە، الەمدە دە جاڭا تۋعان نارەستەلەردى COVID-19-عا قارسى ۆاكسيناتسيالاۋ جۇرگىزىلىپ جاتقان جوق. قازاقستاندا 12 جاستان اسقان بالالارعا عانا COVID-19-عا قارسى ۆاكسينا سالىنادى. رۇقسات ەتىلگەن ۆاكسينا - Pfizer/BioNTech شىعارعان Comirnaty. ونى ددسۇ ماقۇلدادى. قازاقستاندا 12 جاستان اسقان جاسوسپىرىمدەردى تەك ولاردىڭ اتا- انالارىنىڭ نەمەسە قامقورشىلارىنىڭ ەرىكتى كەلىسىمىمەن عانا ۆاكسيناتسيالايدى»، - دەلىنگەن رەسمي وكىل تاراتقان مالىمەتتە.
