سارى اعاشتىقتار ءۇي ىرگەسىندەگى باقشاعا گۇل ەگىپ، پايداعا كەنەلىپ وتىر

تۇركىستان. قازاقپارات – سارى اعاشتىقتار ۇيىرگەلىك جەرگە گۇل ەگىپ، كول- كوسىر پايداعا كەنەلىپ وتىر، دەپ حابارلايدى قازاقپارات ءتىلشىسى.

تۇركىستان وبلىسى سارىاعاش اۋدانىندا 80 گە جۋىق وتباسى گۇل وسىرۋمەن اينالىسىپ كەلەدى. ءبىر قىزىعى، قىس مەزگىلىندە دە بۇل كاسىپ توقتامايدى. سەبەبى، ۇيىرگەلىك جەرگە جىلىجاي سوققان تۇرعىندار جىل ون ەكى اي بويى گۇل ءوسىرىپ، ساتىلىمعا شىعارىپ وتىر.

دەربىسەك اۋىلىنىڭ تۇرعىندارى دا گۇل وسىرەتىن شاعىن كاسىپكە بەيىمدەلگەن. سونىڭ ءبىرى - ماحات اۋەشوۆ. ول جيىرما جىلدان بەرى وسى كاسىپپەن اينالىسىپ كەلەدى. شارۋا 20 سوتتىق جەرىندەگى جىلىجاي اۋماعىنان العان ونىمدەرىن ساتۋ ارقىلى وتباسىن اسىراپ وتىر. ال اۋلاسىندا راۋشاننان باستاپ السترومەريا، حريزانتەما سىندى شەتەلدىك سۇرىپتى گۇلدەر ءوسىپ تۇر.

«گۇل كوشەتتەرىن ءوسىرۋدىڭ وزىندىك قيىندىقتارى بار. ەگىلگەن گۇلدى ءار 10-15 كۇن سايىن سۋارىپ تۇرۋ كەرەك. جىلىجايداعى قالىپتى تەمپەراتۋرا 10-15 گرادۋس بولۋى شارت. ال ناۋرىز ايىنىڭ باسىنان باستاپ ساباعىنان قىرقىلعان گۇلدەر ساتىلىمعا شىعا باستايدى. مەرەكە سايىن كورشىلەر مەن اعايىن- تۋىسقا ءوز اۋلامىزدا وسكەن گۇلدەردى سىيعا تارتامىز. بۇل كەز كەلگەن جاننىڭ كوڭىلىنە ەرەكشە قۋانىش سىيلايتىنى انىق»، - دەيدى ول.

كاسىپكەردىڭ گۇلدەرىنە دەگەن سۇرانىس تا جوعارى. اسىرەسە شىمكەنت، الماتى، نۇر- سۇلتان قالالارىنان ارنايى تاپسىرىس بەرۋشىلەر قاتارى قالىڭ. ال، ناۋرىز مەرەكەسىنىڭ قارساڭىندا تاپسىرىس كولەمى ۇلعايىپ، كوتەرمە باعامەن الىپ كەتۋشىلەر دە كەزدەسەدى. جالپى وتكەن جىلى سارىاعاشتىق شارۋالار 600 مىڭعا جۋىق گۇل وسىرگەن.