ەلوردادا گەروين ساتقان كۇدىكتى ايەلدەر ۇستالدى

نۇر-سۇلتان. قازاقپارات - ەلوردانىڭ پوليتسەيلەرى ارنايى وپەراتسيا جۇرگىزىپ، ونىڭ بارىسىندا قالا اۋماعىنا ەسىرتكى زاتتارىن جەتكىزۋ مەن وتكىزۋ «ارناسىن» جويدى، دەپ حابارلايدى قازاقپارات ءتىلشىسى.

نۇر-سۇلتان قالالىق پوليتسيا دەپارتامەنتىنىڭ مالىمەتىنشە، جەدەل-ىزدەستىرۋ ءىس-شارالارىن وتكىزۋ كەزىندە اسا ءىرى مولشەردە ەسىرتكىنى ساقتاعانى ءۇشىن بۇرىن ەسىرتكى قىلمىسى ءۇشىن سوتتالعان 40 جاستاعى ايەل ۇستالدى.

جەكە ءتىنتۋ كەزىندە ودان ساتۋعا دايىندالعان «گەروين» ەسىرتكى زاتىنىڭ 21 ءتۇيىنى تاركىلەندى.

«ەسىرتكىنىڭ نەگىزگى جەتكىزۋشىسىن انىقتاۋ ماقساتىندا جۇرگىزىلگەن جەدەل-ىزدەستىرۋ ءىس-شارالارى بارىسىندا پوليتسەيلەر ەسىرتكى قىلمىسى ءۇشىن سوتتالعان 32 جاستاعى كۇدىكتىنى ۇستادى. ول ءتورت گرامنان استام «گەروين» ەسىرتكى زاتىن ساتقان. اتالعان فاكتى بويىنشا ق ر ق ك 297-بابى 3-بولىگى «ەسىرتكى زاتتاردى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، ساتىپ الۋ، ساقتاۋ، تاسىمالداۋ، جونەلتۋ نەمەسە وتكىزۋ» بويىنشا قىلمىستىق ءىس قوزعالدى»، - دەپ اتاپ وتەدى ۆەدومستۆودان.