الەم بالالار ادەبيەتىنەن قانداي شەتەلدىك قالامگەرلەردىڭ شىعارمالارى قازاق تىلىندە جارىق كوردى
بۇل تۋرالى ءماجىلىس دەپۋتاتتارىنىڭ ساۋالىنا ق ر پرەمەر- ءمينيسترىنىڭ ورىنباسارى ەرالى توعجانوۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«بۇگىنگى كۇنى «رۋحاني جاڭعىرۋ» باعدارلاماسى اياسىندا الەم ادەبيەتى اۆتورلارىنىڭ اۋدارمالارى جارىق كورۋدە. 2021 -جىلى الەم بالالار ادەبيەتىنىڭ دانيەل دەفو «روبينزون كرۋزو» (اۋدارعان كەڭەس دۇيسەن)، دجوناتان سۆيفت «گۋلليۆەردىڭ ساياحاتتارى» (اۋدارعان جامالحان اسىقوۆا)، ستيۆەنسون روبەرت ليۋيس «قازىنا ارالى» (اۋدارعان قادىر ءداۋىتوۆ) سياقتى اۆتورلاردىڭ اۋدارمالارى باسىلىپ شىعىپ، رەسپۋبليكا كىتاپحانالارىنا تاراتىلدى»، - دەپ اتاپ وتەدى ەرالى توعجانوۆ جاۋابىندا.
ونىڭ اتاپ وتۋىنشە، «رۋحاني جاڭعىرۋ» باعدارلاماسىن ىسكە اسىرۋدىڭ 2021 -جىلعا ارنالعان جول كارتاسى اياسىندا «زاماناۋي قازاقستاندىق مادەنيەت» جوباسى ىسكە اسىرىلدى. الەمنىڭ 53 ەلىندە 280 ءىس- شارا، ونىڭ ىشىندە ءتۇرلى كەزدەسۋلەر، ءمۇشايرالار، فورۋمدار مەن كەزدەسۋلەر وتكىزىلدى.
«بارلىق ءىس- شارالارعا وتاندىق ادەبيەتشىلەر مەن قالامگەرلەر قاتىسىپ، شەتەلدىك ادەبيەت وكىلدەرىمەن پىكىر الماسىپ، وقىرماندى ءوز شىعارماشىلىعىمەن تانىستىرۋعا مۇمكىندىك الدى. الداعى ۋاقىتتا دا ادەبيەتشىلەر مەن قالامگەرلەردى ءتۇرلى ادەبي فەستيۆال، فورۋمدارعا قاتىستىرۋ جانە ولاردىڭ شەتەلدىك قالامگەرلەرمەن تاجىريبە الماسۋىن ۇيىمداستىرۋ جالعاسادى»، - دەدى ۆيتسە- پرەمەر.
اۆتور: مارلان جيەمباي
