ەنەرگەتيكا ءمينيسترى مۇناي قىمباتتاسا، قازاقستانعا قانداي كەرى اسەرى بولاتىنىن ايتتى

نۇر- سۇلتان. قازاقپارات - ورتالىق كوممۋنيكاتسيالار قىزمەتىندە وتكەن بريفينگىدە ق ر ەنەرگەتيكا ءمينيسترى بولات اقشولاقوۆ مۇناي قىمباتتاۋىنىڭ وڭ جانە تەرىس جاقتارىن اتادى، دەپ حابارلايدى قازاقپارات ءتىلشىسى.

«ءيا، مۇنايدىڭ ءبىر باررەلى 96 دوللار بولاتىنى تۋرالى جاڭالىق شىقتى. مۇنايدىڭ باعاسى جوعارى بولسا، ءبىرىنشى كەزەكتە بيۋدجەت پەن ۇلتتىق قورعا تۇسەتىن كىرىس جوعارى بولادى. ۆەدومستۆو بيىل 87,5 ميلليون توننا دەڭگەيىندە مۇناي ءوندىرۋدى جوسپارلاپ وتىر. ونىڭ 17,9 ميلليون تونناسى ىشكى وڭدەۋگە باعىتتالادى»، - دەدى بولات اقشولاقوۆ.

مينيستر قالعان مۇنايدىڭ ءبارى ەكسپورتقا شىعاتىنىن ەسكەرسەك، بيۋدجەتكە تۇسەتىن سالىق كوبەيۋى مۇمكىن ەكەنىن ايتادى. دەگەنمەن، ول بۇل تەندەنتسيانىڭ كەيبىر جاعىمسىز جاقتارى دا بار ەكەنىن ەسكەرتتى.

«مۇناي باعاسى وتە جوعارى بولسا، اسا جاقسى ەمەس. ويتكەنى بارلىق بىرىكتىرىلگەن شىعىن ماتەريالدارىنىڭ: قۇبىر ونىمدەرىنىڭ، حيميالىق رەاگەنتتەردىڭ باعاسى وسەدى. ياعني، مۇنايدى الۋعا قاجەت جانە مۇنايدا الىناتىن ءتۇرلى ماتەريالدار قىمباتتايدى. كەيىن مۇناي باعاسى تۇسكەنىمەن، الگى بۇيىمداردىڭ باعاسى سول كۇيى قالىپ قويادى. مۇناي ءوندىرۋشى كاسىپورىندار قازىردىڭ وزىندە وسىدان زارداپ شەگۋدە. سوندىقتان، مەنىڭ ويىمشا، ىڭعايلى ءدالىزدىڭ شەگى، 80 دوللاردان (ءبىر باررەل ءۇشىن. - رەد.) ءسال جوعارى بولسا، ارينە، جاقسى. مۇنى الەمدەگى نارىق كورسەتەدى»، - دەپ تۇيىندەدى ەنەرگەتيكا ءمينيسترى.

اۆتور: ەسىمجان ناقتىباي