قالاي جاتىپ ۇيىقتاعان دۇرىس - مامان جاۋابى

نۇر-سۇلتان. قازاقپارات - دۇرىس ۇيىقتاماي ادام دەنساۋلىعىنا زيان جانە بۇل ادەت بولىپ كەتسە اعزا سوزىلمالى اۋرۋعا شالدىعادى، دەپ ەسكەرتتى نەۆروپاتولوگ- سومنولوگ ەلەنا ساريەۆا.

ول Sputnik راديوسىنا بەرگەن سۇحباتىندا قالاي جاتىپ ۇيىقتاعان ادام دەنساۋلىعىنا زيان ەكەنىن ايتتى.

ادامدار ءجيى ءبىر قالىپتا ۇيىقتاۋعا داعدىلانادى، ءبىراق كەيدە بۇل دەنساۋلىققا زيان تيگىزەدى. مىسالى، ءبىر قىرىنان جاتىپ ۇيىقتاۋ مەديتسينالىق تۇرعىدان ەڭ پايدالى. ءبىراق سول جاقپەن جاتىپ ۇيىقتاۋ كەزىندەگى قىسىم جۇرەك اۋرۋى بار ادامنىڭ جاعدايىنا كەرى اسەر ەتۋى مۇمكىن، مۇنداي ادامدار وڭ جاعىمەن جاتقانى دۇرىس، دەپ سانايدى ساريەۆا.

«ءبىر قىرىنان جاتىپ ۇيىقتاعان جاقسى. بۇل پوزيتسيادا مەتابوليكالىق ونىمدەردى جويۋ جىلدامدايدى»، - دەپ ناقتىلادى نەۆروپاتولوگ-سومنولوگ.

دارىگەردىڭ ايتۋىنشا، قورىلدايتىن جانە وسىنداي جاعدايدا تىنىسى ءۇزىلىپ قالاتىن ادامدار شالقاسىنان ۇيىقتاماعانى ءجون.

«ەگەر ۇيقى كەزىندە تىنىس الۋدىڭ كىدىرىسىن تۋدىراتىن قورىل مەن ءتىلدىڭ تارتىلۋى بولسا شالقاسىنان جاتىپ ۇيىقتاۋعا بولمايدى»، - دەدى ول.

دارىگەردىڭ ايتۋىنشا، ادامعا ەڭ زيانى ەتپەتىنەن جاتىپ ۇيىقتاۋ. ەگەر ۇزاق ۋاقىت بويى وسى كۇيدە ۇيىقتايتىن بولساڭىز، ونىڭ سالدارىنان ومىرتقا اۋىرادى.

«بۇل تاڭەرتەڭ مويىن مەن باستىڭ اۋىرۋىنا اكەلۋى مۇمكىن. ەتبەتىنەن جاتىپ ۇيىقتاۋ اسقازانعا دا سالماق ءتۇسىرىپ، مەتابوليكالىق پروتسەستەردىڭ بۇزىلۋىنا اكەلەدى جانە السگەيمەر اۋرۋىنىڭ دامۋىنا سەبەپ بولۋى مۇمكىن»، - دەدى ساريەۆا.

ەتپەتتەپ جاتقاندا باستى ءبىر جاققا بۇرۋ كەرەك بولادى. ال ول مويىن تۇسىنداعى قان تامىرلارىنىڭ جۇمىسىنا كەدەرگى كەلتىرىپ، ميعا قان مەن وتتەگى بارۋىن تەجەيدى.