گەبەرت شاعىمى: ۇلتتىق قۇراما وليمپيادان ورالعاننان كەيىن تەكسەرۋ جۇرگىزىلەدى
بۇل تۋرالى ءماجىلىس دەپۋتاتتارىنىڭ ساۋالىنا ق ر باس پروكۋرورىنىڭ مىندەتىن اتقارۋشى بەرىك اسىلوۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«مادەنيەت جانە سپورت مينيسترلىگىنىڭ مالىمەتىنە سايكەس، گەبەرت ۇلتتىق شاڭعى قاۋىمداستىعىنىڭ حاتى نەگىزىندە فريستايل- موگۋلدان ۇلتتىق كوماندانىڭ شتاتتىق قۇرامىنان شىعارىلعان. دەگەنمەن، مينيسترلىك تاراپىنان فريستايلشى گەبەرت شاعىمى بويىنشا تەكسەرۋ جۇرگىزىلمەگەن. بۇل ماسەلەنى مينيسترلىك ەلىمىزدىڭ ۇلتتىق قۇراماسى قىسقى وليمپيادادان ورالعاننان كەيىن قارايتىن بولادى»، - دەلىنگەن بەرىك اسىلوۆتىڭ جاۋابىندا.
ايتا كەتەيىك، 2021 -جىلدىڭ قازان ايىندا فريستايلدان ۇلتتىق قۇرامانىڭ بۇرىنعى سپورتشىسى الەكساندر گەبەرت ءوز باپكەرىن الىم-سالىق جينادى، بىلىكسىزدىك تانىتتى جانە قۇرامادان زاڭسىز شىعاردى دەپ ايىپتاعان ەدى. ودان كەيىن ق ر مادەنيەت جانە سپورت ۆيتسە-ءمينيسترى سەرىك جاراسبايەۆ فريستايلدان ۇلتتىق قۇرامانىڭ بۇرىنعى سپورتشىسىنىڭ ءوز باپكەرىن سىبايلاس جەمقورلىق جاسادى دەپ ايىپتاعانى تۋرالى سۇراقتارعا جاۋاپ بەرگەن بولاتىن.
اۆتور: مارلان جيەمباي
