الاياقتار ينتەرنەت ارقىلى تۇرعىنداردى قالاي الدايدى
ال بيىل جىل باستالعالى 1177 ينتەرنەت الاياقتىق قىلمىس جاسالدى.
بۇل تۋرالى ق ر ءى ءى م كريمينالدىق پوليتسيا دەپارتامەنتى كيبەرقىلمىسقا قارسى كۇرەس ورتالىعى باسشىسىنىڭ مىندەتىن اتقارۋشى رۇستەم دۇيسەتايەۆ ءمالىم ەتتى، دەپ حابارلايدى قازاقپارات ءتىلشىسى.
«وتكەن جىلى ەلىمىزدە 41 مىڭ الاياقتىق جاسالدى. بيىل قاڭتاردا ونىڭ سانى 2,5 مىڭعا جەتتى. تالداۋ ناتيجەسى كورسەتكەندەي الاياقتىق كوبىنەسە قارىزعا اقشا بەرۋ ارقىلى جاسالادى. ناقتى تۇرلەرىن اتاساق، تومەنگى پايىزبەن نەسيە بەرۋ، قىزمەت كورسەتۋ، جىلجىمايتىن مۇلىكتى ساتۋ تاعى سول سياقتى. سيفرلىق تەحنولوگيا دامىعان سايىن الاياقتىقتىڭ ءتۇرلى ءادىس- ءتاسىلى پايدا بولىپ جاتىر. ياعني يتنەرنەت الاياقتىق»، - رۇستەم دۇيسەتايەۆ مينيسترلىكتە ونلاين وتكەن باسپا ءسوز ءماسليحاتىندا.
مينيسترلىك ۇسىنعان ستاتيستيكاعا سۇيەنسەك، 2020 -جىلى ەلىمىزدە 14 مىڭ ينتەرنەت الاياقتىق جاسالسا، وتكەن جىلى ونىڭ سانى 21 مىڭعا جەتكەن.
«بيىل قاڭتاردا ينتەرنەت ارقىلى 1177 الاياقتىق ارەكەت ىستەلگەن. ينتەرنەت الاياقتىق قىلمىسىنىڭ كەڭ تارالعان ءتۇرى - تاۋار ساتۋ. ياعني ينتەرنەت ارقىلى تاۋار ساتادى، ساتىپ الۋشى الدىن الا اقشاسىن تولەيدى، ءبىراق تاۋار جوق. سودان سوڭ ميكروكرەديتتىك مەكەمەلەردەن ونلاين نەسيە الۋ. ينتەرنەت الاياقتىقتىڭ تاعى ءبىر كەڭ تاراعان ءتۇرى ازاماتتاردىڭ جەكە دەرەكتەرىن ءبىلىپ الىپ، بانك كارتاسىنان اقشاسىن سىپىرىپ الۋ. كوبىنەسە الاياقتار وزدەرىن بانك قىزمەتكەرىمىن دەپ تانىستىرادى دا كليەنتتەن جەكە مالىمەتتەردى سۇرايدى، ودان ءارى جاعداي بەلگىلى»، - دەيدى ول.
