شەتەل اسقان قارجىنى قايتارۋعا بولا ما؟
ساياسات تانۋشى يسلام كۋرايەۆ ليتەر باسىلىمىنا بەرگەن سۇحباتىندا: پرەزيدەنتتىڭ بۇل تاپسىرماسىن ورىنداۋ ۇزاق ۋاقىت الاتىنىن ايتقان. الدىمەن مەملەكەت زاڭسىز شىعارىلعان قارجىنىڭ قازاقستانعا تيەسىلى ەكەنىن دالەلدەۋى ءتيىس. كەيىن اكتيۆتەردى بۇعاتتاۋ جونىندە ۋاعدالاسادى. سودان سوڭ عانا ەلدەر اراسىندا ميلياردتتاردى قايتارۋ بويىنشا كەلىسسوز جۇرەدى.
«جۇمىس وتە اۋقىمدى. ونى تەك سوت قانا شەشىپ بەرە المايدى. مۇنىڭ ساياسي سيپاتى بار. ەگەر مەملەكەتتەر ءبىر شەشىمگە كەلمەسە، ءىستىڭ سوزبالاڭعا سالىناتىنىن ەسكەرۋ كەرەك»، - دەيدى ول.
ال ەلدەگى قارجىلىق مونيتورينگ اگەنتتىگى جۇمىس باستالعانىن، قوسىمشا اقپارات جۋىق ارادا جاريالاناتىنىن حابارلادى.
ەسكە سالايىق، مەملەكەت باسشىسى قىر اسقان قارجىنى قايتارۋ جوسپارىن ەكى ايدا ازىرلەۋدى تاپسىردى. وسى ارالىقتا اگەنتتىك كىم جانە قانشا قارجىنى شەتەل اسىرعانىن انىقتاپ، ءتىزىمدى حالىقارالىق ۇيىمدارعا ۇسىنۋى ءتيىس.
www.24.kz
