مەيىرىم مەكەنى

نۇر-سۇلتان.قازاقپارات - تارىققاندا تىعىرىقتان شىعارار، قامىققاندا مۇڭ تارقاتار، قۋانعاندا كوڭىلىڭدى كوكجيەكپەن استاستىرار جۇرەكتىڭ ەمى - اۋىل.

بالا كۇنىندە اتا- اجەسىنىڭ اسەرلى اڭگىمەسىن تىڭداپ، ولاردىڭ ءار ايتقان ءسوزىن ساناسىنا ءسىڭىرىپ، ەل تاريحىنا قۇمارتىپ وسكەن جان سول اياداي مەكەننەن ىزگىلىك ىزدەيتىن ادەتى. كەيدە مەن دە وسى كارتيناعا قاراپ اناۋ قىراتتا قالىپ كەتكەن ءوزىمنىڭ وزەگىمدى ىزدەيمىن.

ءالدي- ءالدي دۇنيە! مىنا عاسىردى يىعىنا كوتەرىپ تۇرعان ءبىر ۋىس مەيىرىمدىلىك سەكىلدى. قالاي ويلايسىز؟ «اي بولماي- اق قويايىن اسپانىڭدا، مەيىرىمىڭ بولايىن دوس، باۋىرعا». مۇزبالاق اقىن مۇقاعاليدا سونى مەڭزەيدى. جۇرەككە بىتكەن جىر. ادام كوڭىلىنە تۇسكەن ساۋلەنىڭ ەڭ اسىلى دا سول. الەمدى الديلەيتىن اۋەن دە سودان تۋادى. ال ونى قايدان الامىز؟ ارينە، اۋىلدان. بۇل ەشقانداي انىقتاما قاجەت ەتپەيتىن جاۋاپ. ءوزىڭىز تۋعان ولكەنىڭ توپىراعىنا تابانىڭىز ءتيىپ، الپىس ەكى تامىرىڭىز ءيىپ قايتاتىنىڭىزعا ءسوزىمىز كەپىل. بالالىعىڭنىڭ بالاباقشاسىنداي كورىنگەن الاقانداي مەكەن اقۋىز تىلەگىڭە سەپ، قيالىڭا قانات. بەلگىلى سۋرەتشى راحمان بەرتىلەۋ «اپا مەن نەمەرە» كارتيناسىندا وسىنى ايتقىسى كەلگەندەي.

قويانجون قۇم جوتالاردى قوينىنا باسىپ جاتقان ايناكول اۋىل ۇلكەن جولدىڭ جيەگىندە ورنالاسقان. باۋرايى تولعان جاسىل جەلەك. جەرگە جاپسىرىلعان كۇن ىسپەتتى كوركەم. كوكتەم كەلسە بولعانى سۋرەتشىنىڭ قيالىنداي ادەمى كورىنىس پايدا بولادى. كومپوزيتسيا كەيىپكەرى شەبەردىڭ ءوزى، بالداۋرەن ساتتەن ءبىر ۇزىك سىر شەرتەدى. اجەنىڭ الاقانىندا وسكەن تاقيالى بالانىڭ مالدىڭ سوڭىندا ءجۇرىپ- اق مەيىرىمگە كەنەلگەنى، جايلاۋدا جاتىپ- اق رۋحاني ءورىسى ارتقانى بايقالادى.

جالپى، قىلقالام شەبەرى شىعارماشىلىعىندا ەموتسيونالدى كۇيدىڭ جەتەگىندە ەرىپ، قاعازعا تۇسكەن نارسەنىڭ ءبارىن جان- تانىمەن سەزىنىپ بەينەلەيدى. سودان دا بولار ول كەسكىندەمە جانرىندا رەاليزمنىڭ جاقتاۋشىسى بولسا، گرافيكادا جۇمباعى كوپ الەمدى سۋرەتتەۋدە وزىندىك قولتاڭباسىن قالدىرعىن ناعىز مايتالماننىڭ ءوزى.

ونەردى زەرتتەۋشىلەر راحمان بەرتىلەۋدى پەيجازدىڭ شەبەرى ەكەنىن ايتادى. دەگەنمەن ول سۋرەتشىلەر اراسىندا تالعام مەن باعىتتىڭ كوپتۇرلىلىگىنە قاراماستان، شىنايى ويدىڭ شەڭبەرىنەن الىستامادى. سۋرەتشىنىڭ قاي تۋىندىسىن الىپ قاراساڭىز دا، جوعارى كاسىبي دايىندىق مەنمۇندالاپ تۇرادى. ەڭ باستىسى، ءبىز اۆتوردىڭ اتالعان شىعارماسىنان وزىمىزگە كەرەك دۇنيەنى تابا الدىق! بۇدان ارتىق نە كەرەك؟ !

مۇحتار كۇمىسبەك

egemen.kz