توكيودا جۇلدە العان «اقىن» فيلمى بەرليندە كورسەتىلدى

نۇر-سۇلتان. قازاقپارات - حالىقارالىق بەرلين كينوفەستيۆالىنىڭ «فورۋم» باعدارلاماسىندا شاكەن ايمانوۆ اتىنداعى «قازاق فيلم» تۇسىرگەن «اقىن» فيلمىنىڭ ەۋروپالىق تۇساۋكەسەرى ءوتتى، دەپ حابارلايدى قازاقپارات.

وتاندىق تۋىندىنى پروديۋسەر يۋليا كيم جانە اكتريسا گۇلجان تۇزەلبايەۆا تانىستىردى.

«فيلمنىڭ تۇساۋكەسەرىنە قاتىسىپ وتىرعانىمىزعا وتە قۋانىشتىمىز. رەجيسسەر دارەجان ومىربايەۆ كورسەتىلىمگە قاتىسا المادى. ءبىزدىڭ فيلم تيكتوك جايلاعان داۋىردە ساف ونەردىڭ - پوەزيانىڭ ەشكىمگە دە كەرەك بولماي قالعانى تۋرالى باياندالادى. مەنىڭ ويىمشا، شىنايى ونەرگە بەرىلگەن كەيبىر شىعارماشىلىق جاندار بۇل فيلمدە وزدەرىن كورە الادى. مەن فيلمدەگى باستى كەيىپكەردىڭ وبرازىندا رەجيسسەردىڭ ءوزىن كورىپ تۇرعاندايمىن. وسى كينوتۋىندىنىڭ جارىق كورۋىنە اتسالىسۋعا مۇمكىندىك بەرگەن دارەجان ومىربايەۆقا العىسىمدى بىلدىرەمىن»، - دەدى يۋليا كيم.

قازاقستاندىق كينوتۋىندى بەرلين كينوفەستيۆالى كورەرمەندەرىنىڭ ەرەكشە قىزىعۋشىلىعىن تۋدىرعان.

بۇل كورسەتىلىمگە بيلەتتەر بىرنەشە كۇن بۇرىن ساتىلىپ كەتكەن ەكەن. تۇساۋكەسەرگە كەلگەن قوناقتاردىڭ اراسىندا دارەجان ومىربايەۆتىڭ شىعارماشىلىعىمەن بۇرىننان تانىس كورەرمەندەر دە بولدى.

«اقىن» فيلمى تەحنولوگيالار دامىعان قازىرگى زاماندا ونەردىڭ قوعامدا الاتىن ورنى تۋرالى وي قوزعاپ، پوەزياعا سۇرانىس ازايعان داۋىردە اقىننىڭ كۇيىنىشى تۋرالى سىر شەرتەدى. قازاق حالقىنىڭ XIX عاسىرداعى ەڭ كورنەكتى اقىندارىنىڭ ءبىرى ماحامبەت وتەمىس ۇلىنىڭ قيلى تاعدىرى جايىندا ويعا باتقان باستى كەيىپكەر نازىك جۇرەكتى اقىنداردىڭ ءومىرى قاشان دا قيىن بولعانىن تۇسىنەدى.

فيلمنىڭ سەناريى نەمىس جازۋشىسى گەرمان گەسسەنىڭ «اۆتورلىق كەش» اتتى اۆتوبيوگرافيالىق اڭگىمەسى جەلىسىمەن جازىلعان.

فيلمدەگى باستى ءرولدى «جىگىتتەر» توبىنىڭ ءانشىسى ەردوس قانايەۆ سومدايدى.