11:14, 13 - اقپان 2022 | GMT +5
باس پروكۋرور: بۇلتارتپاس دالەل بولعان جاعدايدا عانا كىنالىلەردى جاۋاپكەرشىلىككە تارتامىز
نۇر-سۇلتان. قازاقپارات - كەشەگى قاۋىپسىزدىك كەڭەسىنىڭ شۇعىل وتىرىسىندا باس پروكۋرور عيزات نۇرداۋلەتوۆ قاڭتار وقيعاسىنا قاتىستى تەرگەۋ جۇمىستارىنىڭ بارىسى تۋرالى باياندادى، دەپ حابارلايدى قازاقپارات.
ونىڭ ايتۋىنشا، قازىرگى ۋاقىتتا 3024 قىلمىستىق ءىس بويىنشا تەرگەۋ امالدارى جۇرگىزىلۋدە. ارناۋلى پروكۋرورلاردىڭ باسشىلىعىمەن ۆەدومستۆوارالىق تەرگەۋ توبى جاپپاي تارتىپسىزدىك پەن تەررورلىق اكتىلەر بويىنشا 177 ءىستى قاراپ جاتىر.
جالپى پروكۋراتۋراعا ۇستالعاندار تاراپىنان 305 شاعىم تۇسكەن. قۇقىق بۇزۋشىلىققا قاتىستى 62 شاعىم راستالمادى. ازاپتاۋ جانە بيلىگىن اسىرا پايدالانۋ دەرەگى بويىنشا 170 قىلمىستىق ءىس قوزعالدى.
«ءاربىر ءىستى ەگجەي-تەگجەيلى تەكسەرەمىز جانە بۇلتارتپاس دالەلدەر بولعان جاعدايدا عانا كىنالىلەردى جاۋاپكەرشىلىككە تارتامىز»، - دەدى باس پروكۋرور.
ەسكە سالا كەتەيىك، كەشە مەملەكەت باسشىسىنىڭ توراعالىعىمەن قاۋىپسىزدىك كەڭەسىنىڭ شۇعىل وتىرىسى ءوتتى.
