ماڭعىستاۋدا كاسپي تەڭىزىنىڭ جاعالاۋىندا كەمە جوندەيتىن زاۋىت سالىنادى

اقتاۋ. قازاقپارات - كەشە ءوڭىر باسشىسى نۇرلان نوعايەۆتىڭ توراعالىعىمەن ماڭعىستاۋ وبلىسىن ۇدەمەلى يندۋستريالدى دامىتۋ جونىندەگى وڭىرلىك ۇيلەستىرۋ كەڭەسىنىڭ وتىرىسى ءوتتى.

بۇل جايىندا وبلىس اكىمىنىڭ باسپا ءسوز قىزمەتىنە سىلتەمە جاساپ قازاقپارات حابارلايدى.

جيىندا كەمە جاساۋ جانە كەمە جوندەۋ سالاسىنداعى ينۆەستيتسيالىق جوبا قارالدى.

اتاپ ايتقاندا، جەرگىلىكتى كاسىپكەر تەڭىز ايلاعى بار كەمە جاساۋ جانە كەمە جوندەۋ زاۋىتىنىڭ قۇرىلىسىن جوسپارلاپ وتىر. جاڭا كاسىپورىن 2025-جىلى پايدالانۋعا بەرىلۋى ءتيىس.

نىسان اقتاۋ قالاسى ءومىرزاق اۋىلىنىڭ اۋماعىندا سالىنادى.

- قازىر كولەمى جوعارى تونناج كەمەلەرى بار ازاماتتار جوندەۋ جۇمىستارىن رەسەي، ءازىربايجان، يران سياقتى كورشىلەس كاسپي ماڭى ەلدەرىندە جۇرگىزۋگە ءماجبۇر. سوندىقتان ءبىز اتالعان قىزمەتتى ماڭعىستاۋدا ىسكە اسىرىپ، ءوڭىردىڭ بيۋجەتىن تولىقتىرۋ ماقساتىندا وسى جۇمىستى قولعا العىمىز كەلەدى. جوبا اياسىندا جىلىنا جالپى سىيىمدىلىعى 2000 تىركەلىمدىك توننانى قۇرايتىن 9-10 نان استام كەمەگە جوندەۋ جۇرگىزىلىپ، 2 جىلدا 1-2 كەمە قۇراستىرۋدى كوزدەپ وتىرمىز. قىزمەت بىلىكتىلىك قوعامداستىقتارىنىڭ قاداعالاۋىمەن حالىقارالىق ستاندارتتارعا سايكەس جۇزەگە اسىرىلادى، - دەدى «كەمە جابدىقتارى جانە سەرۆيس» كومپانياسىنىڭ باس ديرەكتورى دميتري دونسكيح.

ايتا كەتەيىك، زاۋىت تولىق ىسكە قوسىلعاننان كەيىن 200 گە جۋىق ادامدى تۇراقتى جۇمىسپەن قامتاماسىز ەتەدى.

ۇيلەستىرۋ كەڭەسىنىڭ مۇشەلەرى ۇسىنىلعان جوبانى ماقۇلدادى.

وبلىس اكىمى نۇرلان نوعايەۆ جۇزەگە اسىرىلاتىن جوبالارعا جەرگىلىكتى اتقارۋشى ورگاندار تاراپىنان قاجەتتى قولداۋ كورسەتىلەتىنىن ايتتى.

جيىن قورىتىندىسى بويىنشا ءوڭىر باسشىسى جاۋاپتى تۇلعالارعا ءبىرقاتار تاپسىرما جۇكتەدى.