كارىم ءماسىموۆتىڭ كامەرادا قانداي جاعدايدا وتىرعانى بەلگىلى بولدى

نۇر-سۇلتان. قازاقپارات - مەملەكەتكە وپاسىزدىق جاساۋ، بيلىكتى كۇشپەن باسىپ الۋ بويىنشا ايىپ تاعىلىپ، تەرگەۋ يزولياتورىندا وتىرعان ۇ ق ك- ءنىڭ ەكس-ءتوراعاسى كارىم ماسىموۆتەن شاعىم تۇسكەن جوق.

بۇل تۋرالى قازاقستانداعى ادام قۇقىقتارى جونىندەگى ۋاكىل ەلۆيرا ءازىموۆا مالىمدەدى دەپ جازدى turkystan.kz.

ومبۋدسمەننىڭ ايتۋىنشا، ۇلتتىق قاۋىپسىزدىك كوميتەتىنىڭ بۇرىنعى باسشىسىنا قىلمىستىق قۇقىقبۇزۋشىلىق جاسادى دەگەن كۇدىكپەن ۇستالعانداردىڭ بارلىعىمەن بىردەي جاعداي جاسالعان.

«ءبىزدىڭ توپتاردا ءماسىموۆ تۋرالى ءبىراز اقپارات بار. ءبىراق ءبىزدىڭ جۇمىسىمىزدىڭ ەرەكشەلىگىنە بايلانىستى بارلىق دەرەكتەردى اشىپ ايتا المايمىز. ازىرگە كارىم ءماسىموۆتىڭ تاراپىنان ەشقانداي شاعىمدار تۇسكەن جوق. سوندىقتان قانداي دا ءبىر مالىمەتتەردى ايتا المايمىن. كامەرا، بۇل - كامەرا. ول جالعىز نەمەسە بىرنەشە ادامعا ارنالعان بولۋى مۇمكىن. مۇنىڭ ءبارى قوعامنان وقشاۋلانۋ ەكەنىن ءتۇسىنۋ كەرەك»، - دەدى ول.

ەلۆيرا ءازىموۆا بۇل جەردە كارىم ماسىموۆكە وزگەلەرگە قاراعاندا ەشقانداي دا ارتىق كۇتىم نەمەسە باسقا دا جاعداي جاسالماعانىن اتاپ ءوتتى.

«ۇستاۋ جاعدايلارىنىڭ ءۇش ءتۇرى بار - ىشكى ىستەر ورگاندارىندا تەرگەۋ يزولياتورلارى، قىلمىستىق-اتقارۋ جۇيەسى كوميتەتىنىڭ قاراماعىنداعى يزولياتورلار جانە ۇ ق ك تەرگەۋ يزولياتورى. ۇستاۋ شارتتارى بويىنشا ولاردىڭ ءبىر-بىرىنەن ءسال ايىرماشىلىعى بار. ەڭ باستىسى، مۇندا وتىرعانداردىڭ ادۆوكاتتارعا، مەديتسينالىق كومەككە، تاماقتانۋعا دەگەن قولجەتىمدىلىك شارتتارى بىردەي»، - دەدى ەلۆيرا ءازىموۆا.