الماتىدا ادەبيەت پەن ونەر قايراتكەرلەرىنە مەملەكەتتىك ستيپەنديالار تابىستالدى
مادەنيەت سالاسىنداعى مەملەكەتتىك ستيپەنديالار جىل سايىن مەملەكەت باسشىسىنىڭ جارلىعىمەن ەلدىڭ مادەني سالاسىن ساقتاۋعا جانە دامىتۋعا ۇلەس قوسقان شىعارماشىل قىزمەتكەرلەردى قولداۋ ماقساتىندا بەرىلەدى. مادەنيەت جانە سپورت مينيسترلىگىنىڭ اقپاراتىنا سۇيەنسەك، بيىل مەملەكەتتىك ستيپەنديا ادەبيەت پەن ونەردىڭ 74 قايراتكەرىنە تاعايىندالدى.
ولاردىڭ قاتارىندا ولجاس سۇلەيمەنوۆ، دۋلات يسابەكوۆ، سوفى سماتايەۆ، ءاسانالى ءاشىموۆ، اقۇشتاپ باقتىگەرەيەۆا، مىرزاتاي جولداسبەكوۆ، ءسابيت دوسانوۆ، بيبىگۇل تولەگەنوۆا، يۋري پومەرانتسيەۆ، دوسحان جولجاقسىنوۆ جانە ت. ب. مايتالماندار بار.
سونىمەن قاتار، رۋحيا بايدۇكەنوۆا، بەيبىت سارىباي، سايدا قالىقوۆا، ەرجان ماكسيم، ناۋرىز ەرنات، تەمىرلان ولجاباي سەكىلدى جاس دارىندارعا مەملەكەتتىك قولداۋ كورسەتىلدى.
مينيستر داۋرەن ابايەۆ سالتاناتتى ءراسىمدى اشا وتىرىپ، ماراپات يەلەرىن شىن جۇرەكتەن قۇتتىقتاپ، مەملەكەتتىك ستيپەنديالاردى تاپسىرۋ ولاردىڭ وتاندىق مادەنيەتتى دامىتۋعا قوسقان ەلەۋلى ۇلەسىن مويىنداۋ ەكەنىن اتاپ ءوتتى.
سونداي-اق، ول بۇگىنگى تاڭدا قوعامدا، اسىرەسە جاستار اراسىندا كونسترۋكتيۆتى رۋحاني قۇندىلىقتاردى ىلگەرىلەتۋ ىسىندە شىعارماشىلىق ينتەلليگەنتسيانىڭ ءرولى ارتىپ كەلە جاتقانىن جەتكىزدى.
سونىمەن قاتار، مينيستر بيىل ەلىمىز احمەت بايتۇرسىن ۇلىنىڭ 150 جىلدىعى، مۇحتار اۋەزوۆتىڭ 125 جىلدىعى، ءازىلحان نۇرشايىقوۆ پەن روزا باعلانوۆانىڭ 100 جىلدىق مەرەيتويلارىن اتاپ وتەتىندىگىن ايتتى.
كەزدەسۋ سوڭىندا داۋرەن ابايەۆ راسىمگە قاتىسۋشىلارعا مىقتى دەنساۋلىق، شىعارماشىلىق تابىس جانە وتباسىلىق باقىت تىلەدى.
