بۇگىن فۋتبولدان كلۋبتار اراسىنداعى الەم چەمپيوناتىنىڭ فينالى وتەدى

نۇر-سۇلتان. قازاقپارات - بۇگىن فۋتبولدان كلۋبتار اراسىنداعى الەم چەمپيوناتىنىڭ فينالى وتەدى، دەپ حابارلايدى قازاقپارات ءتىلشىسى.

ايتا كەتسەك، ءدۇبىرلى دودا بىرىككەن اراب امىرلىگىنىڭ ابۋ-دابي قالاسىندا وتكىزىلۋدە. وعان مۇحيت ايماعىنان - «پيراە» (فرانسۋز پولينەزياسى)، ازيادان - «ال-جازيرا» (بىرىككەن اراب امىرلىگى)، سولتۇستىك امەريكادان - «مونتەررەي» (مەكسيكا)، «ال- حيلال» (ساۋد ارابياسى)، ەۋروپادان - «چەلسي» (انگليا) جانە وڭتۇستىك امەريكادان - «پالمەيراس» (برازيليا) كوماندالارى باق سىناۋعا مۇمكىندىك الدى.

ىرىكتەۋ كەزەڭىندە «ال-جازيرا» «پيراەنى» 4:1 ەسەبىمەن تىزە بۇكتىردى.

ودان كەيىن 1/4 فينالدا «ال-حيليال» «ال-جازيرادان» 6:1، «ال-احلي» «مونتەررەيدەن» 1:0 ەسەبىمەن باسىم ءتۇستى.

جارتىلاي فينالدا «ال-حيليال» «چەلسيگە» 0:1، «ال- احلي» «پالمەيراسقا» 0:2 ەسەبىمەن جول بەردى.

ەندى فينالدا «چەلسي» مەن «پالمەيراس» كوماندالارى شەبەرلىك بايقاسادى. ال 3-ورىن ءۇشىن سايىستا «ال-حيليال» مەن «ال- احلي» كەزدەسەدى.

اتالعان دوپ دوداسى 2000-جىلدان بەرى تۇراقتى تۇردە وتكىزىلىپ كەلەدى. بۇگىنگى كۇنگە دەيىن 16 مارتە ۇيىمداستىرىلدى. چەمپيوندىق اتاققا يسپانيانىڭ «رەال مادريدى» - 4، «بارسەلوناسى» - 3، برازيليانىڭ «كورينتيانس» جانە گەرمانيانىڭ «باۆارياسى» - 2، «ينتەرناسونال»، «سان- پاۋلۋ»، انگليانىڭ «ليۆەرپۋل»، «مانچەستەر يۋنايتەد»، يتاليانىڭ «ميلان» «ينتەر» كوماندالارى - 1 مارتە يە بولدى.