الماتىدا قارۋ-جاراق دۇكەنىنەن مىلتىق ۇرلاعان قىلمىسكەرلەر ۇستالدى

الماتى. قازاقپارات - الماتى پوليتسەيلەرى قارۋ-جاراق دۇكەنىنەن ۇرلانعان قارۋدى تاركىلەدى، دەپ حابارلايدى قازاقپارات ءتىلشىسى.

قالالىق كريمينالدىق پوليتسيانىڭ مالىمەتىنە سايكەس، الماتىدا «كامەراد» قارۋ-جاراق دۇكەنىن توناعان ءۇش ادام ۇستالدى. ولاردان بەس مىلتىق تاركىلەندى.

الماتى قالالىق پوليتسيا دەپارتامەنتى باستىعىنىڭ ورىنباسارى بەرىك ابىلبەكوۆتىڭ ايتۋىنشا، ەكى كۇدىكتى - الماتى وبلىسىنىڭ، تاعى بىرەۋى جامبىل وبلىسىنىڭ تۇرعىنى. ول بۇرىن توناۋ بويىنشا دا سوتتى بولعان ەكەن. ولاردىڭ جاسى 22-24 اراسىندا.

«الماتى وبلىسى، قاراساي اۋدانى اۋماعىندا ارنايى ءىس-شارا بارىسىندا ەكى كۇدىكتى ۇستالسا، تاعى ءبىر ايىپتالۋشى الماتىداعى دوستىق داڭعىلىنداعى ساۋدا ۇيىندە تۇتقىندالدى. ولار قاماۋعا الىندى. ۇستالعانداردىڭ باسقا دا زاڭسىز ارەكەتتەرگە، سونىڭ ىشىندە قاڭتارداعى جاپپاي تارتىپسىزدىكتەرگە قاتىسى بار-جوعى تەكسەرىلىپ جاتىر»، - دەدى بەرىك ابىلبەكوۆ.

تاركىلەنگەن قارۋ سوت-بالليستيكالىق ساراپتاماعا جىبەرىلدى.