مەملەكەت باسشىسى تاتارستانداعى «تانەكو» كەشەنىنە باردى

نيجنەكامسك. قازاقپارات - قاسىم-جومارت توقايەۆتىڭ تاتارستان جەرىندەگى ساپارى نيجنەكامسك قالاسىندا جالعاستى، دەپ حابارلايدى اقوردا.

مەملەكەت باسشىسى تاتارستان رەسپۋبليكاسىنىڭ پرەزيدەنتى رۋستام ميننيحانوۆپەن بىرگە نيجنەكامسك قالاسىنداعى «تانەكو» مۇناي وڭدەۋ جانە مۇناي-حيميا زاۋىتتارىنىڭ كەشەنىنە باردى.

«تاتنەفت» كومپانياسىنىڭ نەگىزگى مۇناي وڭدەۋ اكتيۆى سانالاتىن بۇل كەشەن - رەسەيدە كەڭەس وداعى ىدىراعاننان كەيىن جاڭادان سالىنعان العاشقى ءوندىرىس ورنى.

قازاقستان پرەزيدەنتىنە زاۋىتتاعى ءوندىرىس جۇمىستارىنىڭ بارىسى تانىستىرىلىپ، كەشەننىڭ ونىمدەرى تۋرالى مالىمەت بەرىلدى.

كاسىپورىن 2005-2010-جىلدارى سالىندى. بۇل الىپ كەشەندە جۇمىس ىستەپ تۇرعان قۇرال-جابدىقتىڭ 80 پايىزى رەسەيدە شىعارىلعان. مەملەكەت ەكونوميكاسىنا تىڭ سەرپىن بەرگەن جوبا قۇرىلىس يندۋسترياسىنىڭ، جوبالاۋ عىلىمىنىڭ، ماشينا جاساۋدىڭ، ينجينيرينگتىڭ دامۋىنا جول اشىپ، ەكونوميكانىڭ ارالاس سالالارىنداعى جۇمىسپەن قامتۋ ماسەلەسىنە وڭ سەپتىگىن تيگىزگەن.

كەشەندە 30 ءتۇرلى ءونىم شىعاراتىن 28 وندىرىستىك قوندىرعى جۇمىس ىستەيدى. سونىڭ ىشىندە «ەۆرو-6» ستاندارتىنا سايكەس كەلەتىن اي-92، اي-95، اي-100 اۆتوموبيل بەنزينى مەن ديزەل وتىنى، اۆياتسيالىق كەروسين، كەمە وتىنى، بازالىق مايلار جانە جاعارماي ماتەريالدارى بار.

كومپانيا باسشىلارى پرەزيدەنتكە قازاقستانداعى ساران قالاسىنداعى سالىنىپ جاتقان شينا زاۋىتى مەن اتىراۋدا قولعا الىناتىن كاۋچۋك ءوندىرىسى بويىنشا جوبالار تۋرالى مالىمەت بەردى.

قاسىم-جومارت توقايەۆ ەۋرازيالىق ەكونوميكالىق وداق اياسىندا قازاقستان مەن رەسەي كومپانيالارى اراسىنداعى سەرىكتەستىكتى ودان ءارى نىعايتۋدىڭ ماڭىزدى ەكەنىن، اتالعان كاسىپورىنداردىڭ ەلىمىزدەگى بىرلەسكەن جوبالارىنا قولداۋ كورسەتىلەتىنىن ايتتى.

مەملەكەت باسشىسى «تاتنەفت» كومپانياسىندا تاجىريبە جيناپ جۇرگەن قازاقستاندىق جاستارمەن كەزدەسىپ، ەلگە بىلىكتى مامان بولىپ ورالۋلارىنا تىلەكتەستىك ءبىلدىردى. سونىمەن قاتار جۋىردا «تاتنەفت» كومپانياسى مەن سەمەيدەگى گەولوگيالىق بارلاۋ كوللەدجى اراسىندا ىنتىماقتاستىق تۋرالى كەلىسىمگە قول قويىلدى.

بيىلدان باستاپ قازاقستاندىق كوللەدج ستۋدەنتتەرى اتالعان ءىرى كاسىپورىندا ءوندىرىستى تاجىريبەدەن وتەدى.