بولعان انانىڭ ءمۇسىنى قالاي جاسالدى
وسى ورايدا قازاقپارات ءتىلشىسى تاريحي تۇلعانىڭ بەينەسىن جاساعان ءمۇسىنشى ايدوس ەسماعامبەتوۆپەن تىلدەسكەن ەدى.
«الەمدىك دەڭگەيدەگى مادام تيۋسسو مۋزەيىنىڭ تاجىريبەسىن الساق، ولار ءاردايىم جانە ءارتۇرلى گيپەررەاليستىك بەينە جاسايدى. مىسالى، بيلىك باسىنا جاڭا پرەزيدەنت كەلسە، مىندەتتى تۇردە ونىڭ ءمۇسىنى جاسالادى. ونىڭ قاتارىندا تاريحي تۇلعالار دا بار. بولعان انانىڭ مۇسىنىنە كەلسەك، الدىمەن ارحەولوگتار ونىڭ بەينەسىن جاساپ بەردى. ءمۇسىن شىنايى بولۋى ءۇشىن تۇلعاعا قاتىستى ءار دەرەك وتە ماڭىزدى. ياعني مۇرنى، كوزى مەن بەت-ءجۇزىنىڭ ءپىشىنى - ءبارى ماڭىزدى. تۇلعاعا قاتىستى ماتەماتيكالىق دەرەكتەر بەلگىلى بولعان سوڭ، ودان ءارى ىسكە ءمۇسىنشى كىرىسەدى. بولعان انا تۋرالى جينالعان بار مالىمەتتەرگە سۇيەنە وتىرىپ، ونىڭ بەينەسىن اينىتپاي جاساۋعا تىرىستىم. الدىمەن بەت-بەينەسى، سودان سوڭ قاسى، شاشى جاپسىرىلادى»، - دەدى ايدوس ەسماعامبەتوۆ.
ايتۋىنشا، بۇرىن ءمۇسىنشىنىڭ ايەل بەينەسىن جاساۋ تاجىريبەسى بولماعان. العاش رەت وتكەن جىلى تانىمال ءانشى روزا باعلانوۆانىڭ ءمۇسىنىن جاساعان.
«بۇل - مەنىڭ العاش عىلىمي جۇمىسىم. ال عىلىمدا قاتەلىك جىبەرۋگە بولمايدى. عىلىمدا انتروپولوگيالىق ولشەم دەگەن تۇسىنىك بار. ارينە، جۇمىس بارىسىندا ارحەولوگ ماماندارمەن ۇنەمى بايلانىستا بولدىم. ءمۇسىننىڭ ءار نۇكتەسىن اياقتاعان سوڭ ارحەولوگتارعا كورسەتىپ وتىردىم. وزىمىزگە جاقىن موڭعولويد جانە ازيات ميميكاسىن دا قوستىم. ءمۇسىن ونەرىندە بىرەۋدەن كوشىرۋ نەمەسە ءوز ويىنان شىعارۋ دەگەن بولمايدى، ونىڭ ۇستىنە تاريحي تۇلعا»، - دەيدى ءمۇسىنشى.
ايتا كەتەيىك، بۇگىن ەلورداداعى قر ۇلتتىق مۋزەيىندە بولعان انانىڭ ءمۇسىنى كورمەگە قويىلدى. سونداي-اق، كوپشىلىك نازارىنا مۇسىننەن باسقا ءبىرقاتار قۇندى جادىگەرلەر ۇسىنىلدى. ودان بولەك، وتاندىق ارحەولوگ ايبار قاسەنالين بولعان انا جوشى حاننىڭ قىزى ما، كەلىنى مە دەگەن ساۋالعا قاتىستى پىكىر ءبىلدىرىپ، گەنەتيكالىق تالداۋ جاسالعانىن ايتقان ەدى.
