قاڭتار قىرعىنى جايلى جاڭا ۆيدەودا بانكوماتتىڭ قالاي ۇرلانعانى ءتۇسىپ قالعان

شىمكەنت. قازاقپارات - شىمكەنت پوليتسيا دەپارتامەنتى قاڭتار وقيعاسىنا قاتىستى ۆيدەو جاريالادى.

كادرلاردان بۇزاقىلاردىڭ اكىمدىككە باسىپ كىرگەنىن، پوليتسيا قىزمەتكەرلەرىنە تاس لاقتىرىپ، كۇش قولدانىپ جاتقانىن انىق كورۋگە بولادى، دەپ حابارلايدى قازاقپارات ءتىلشىسى.

ۆيدەودان بەيبىت ميتينگىنىڭ سوڭى جاپپاي بۇزاقىلىققا ۇلاسقانى انىق بايقالادى. ناتيجەسىندە شىمكەنت قالاسى اكىمدىگىنىڭ عيماراتى بۇلىنگەن. ەسىكتەرىن سىندىرىپ، كومپيۋتەرلەردى ۇرلاپ كەتكەن. ال، قۇجاتتاردى تەرەزەدەن تومەنگە لاقتىرعان. اكىمدىك قاسىنداعى «كورمە» ورتالىعى ورتكە وراندى.

بەيبىتشىلىك كوشەسىندە ورنالاسقان «Nur Otan» پارتياسى فيليالىنىڭ عيماراتى دا ءبۇلىندى.

بۇلىكشىلەر نۇرسات شاعىناۋدانىندا ورنالاسقان «مەترو» ساۋدا ءۇيىنىڭ ەسىك-تەرەزەسىن تاسپەن سىندىرىپ، ىشىندەگى بانكوماتتى الىپ شىعىپ، جۇك كولىككە سالىپ ۇرلاپ كەتكەن.

سونىمەن قاتار، ءتارتىپ بۇزۋشىلار قالا اۋماعىندا كوشەلەر قيىلىسى مەن كوشە جەلىلەرىندە قاۋىپسىزدىكتى قاداعالاۋ ماقساتىندا ورناتىلعان بىرنەشە «سەرگەك» جانە باسقا دا بەينەباقىلاۋ كامەرالارىن سىندىرىپ جاتقانى بەينەكامەراعا انىق ءتۇسىپ قالعان.

بيىك باعانالاردا ورناتىلعان بەينەكامەرالاردى ولار ارنايى جۇك كولىگىنىڭ ۇستىنە ءمىنىپ، قولدارىنداعى ارنايى جاراقتارىمەن ۇرىپ قيراتقان. اسكەريلەر مەن پوليتسيا قىزمەتكەرلەرىنە كۇش قولدانىپ، تاس اتقىلاپ جاتقان سيۋجەتتەردە بار.

ۇرۋعا ارنالعان قۇرالداردى كولىكتەن ءبولىپ الىپ جاتقانى دا انىق كورىنەدى. سونداي-اق، ءتارتىپ بۇزۋشىلار قالا اكىمدىگىنىڭ الدىنداعى الاڭدا ورناتىلعان شىرشانى تۇتاتىپ، وت قويعان.

الايدا، شىرشانىڭ بەلگىلى ءبىر بولىگى عانا جانعان.