بولعان انا جوشى حاننىڭ قىزى ما، كەلىنى مە: جاپونيا مەن ۇلى بريتانيا زەرتتەدى
وسى ورايدا ق ر ۇلتتىق مۋزەيىنىڭ حالىق قازىناسى عىلىمي زەرتتەۋ ينستيتۋتىنىڭ باسشىسى، PhD دوكتور، ارحەولوگ ايبار قاسەنالين قازاقپارات تىلشىسىنە تاريحي قۇندى دۇنيەلەر تۋرالى اڭگىمەلەپ بەردى.
«بولعان انا ەسكەرتكىشى قاراعاندى وبلىسى ۇلىتاۋ اۋدانىندا ورنالاسقان. كەسەنەگە ارحەولوگيالىق زەرتتەۋ جۇمىسى 2018-جىلى باستالدى. وسىعان دەيىنگى تاريحي دەرەكتەر بولعان انانى شىڭعىس حاننىڭ قىزى نەمەسە كەلىنى دەپ ايتىپ كەلدى. ءبىراق سوڭعى جىلدارداعى گەنەتيكالىق ساراپتامانىڭ الدىن الا ناتيجەسى بويىنشا جوشى حاننىڭ قىزى دەگەن بولجام بار. كەسەنەدەن قازبا بارىسىندا ءبىراز جادىگەر تابىلدى. اتاپ ايتقاندا، التىن توستاعان، جىبەك ماتادان تىگىلگەن شاپان، ەر-توقىم، قارۋ-جاراق جانە تاعى باسقا زاتتار. جانە تابىلعان زاتتاردىڭ ەرەكشەلىگى سول التىن وردا داۋىرىنەن حابار بەرەدى. جانە تابىلعان جادىگەرلەر بولعان انانىڭ ءوز داۋىرىندە اريستوكراتيا قوعامىنىڭ وكىلى بولعانىن كورسەتەدى»، - دەدى ايبار قاسەنالين.
ونىڭ ايتۋىنشا، ارحەولوگيالىق قازبا جۇمىستارىنان بولەك زەرتحانالىق تالداۋ جاسالعان.
«مىسالى، بولعان اناعا گەنەتيكالىق زەرتتەۋ جاپونيا مەن ۇلى بريتانيادا جاسالدى. بۇگىن كورمەدە بولعان انانىڭ سول كەزدەگى بەينەسىنىڭ جاڭعىرتپاسى قويىلدى. جاڭعىرتپا بىرنەشە انتروپولوگ جانە ءمۇسىنشىنىڭ كومەگىمەن جۇزەگە استى. سونىمەن قاتار ارحەولوگيالىق قازبا جۇمىستارى بولعان انا كەسەنەسىنەن بولەك، جوشى حان، الاشا حان كەسەنەلەرىندە دە ءجۇردى. ودان بولەك، اقمولا وبلىسى اۋماعىندا دا قازبا جۇمىستارى جالعاسىپ، تابىلعان جادىگەرلەر زەرتتەلىپ جاتىر»، - دەيدى ول.
ايتا كەتەيىك، بۇگىن ەلورداداعى ۇلتتىق مۋزەيدە بولعان انا كەسەنەسىنەن تابىلعان جادىگەرلەر مەن بولعان انانىڭ جاڭعىرتىلعان بەينەسى قويىلعان كورمە اشىلدى.
