الەۋمەتتىك ءاميان ەنگىزۋ نەگە كەشىگىپ جاتىر - ەڭبەك مينيسترلىگى ءتۇسىندىردى

نۇر-سۇلتان. قازاقپارات - ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول وسپانوۆ الەۋمەتتىك ءاميان ەنگىزۋ بارىسى نەلىكتەن كەشىگىپ جاتقانىن ءتۇسىندىردى، دەپ حابارلايدى قازاقپارات ءتىلشىسى.

«الەۋمەتتىك ءاميان ەنگىزۋ جۇمىسىن 4 مەملەكەتتىك ورگان، اتاپ ايتقاندا ۇلتتىق بانك، ساۋدا جانە ينتەگراتسيا، ەڭبەك جانە حالىقتى الەۋمەتتىك قورعاۋ، سيفرلىق دامۋ جانە اەروعارىش ونەركاسىبى مينيسترلىكتەرى جۇرگىزىپ جاتىر. بۇل جۇمىس وتكەن جىلى قارقىندى جۇرگىزىلىپ، قاجەتتى نورماتيۆتىك-قۇقىقتىق اكتىلەر قابىلدانعان بولاتىن. قازىرگى ۋاقىتتا ۇلتتىق بانك جۇيەسى ەڭبەك جانە حالىقتى الەۋمەتتىك قورعاۋ مينيسترلىگىنىڭ جۇيەلەرىمەن تەستىلەۋ جۇرگزىلىپ جاتىر. ونى ىسكە قوسۋدى تاياۋ ۋاقىتقا جوسپارلاپ وتىرمىز. ول ءۇشىن ارناۋلى الاڭ دايىندايمىز»، - دەدى ۆيتسە-مينيستر ورتالىق كوممۋنيكاتسيالار قىزمەتىندە وتكەن بريفينگ بارىسىندا.

وسى رەتتە ەربول وسپانوۆ جوباعا ىلكى رەجيمدە قاتىساتىن وڭىرلەردى ءتىزىمى ايقىندالعانىن جەتكىزدى. سونىمەن قاتار ءبىرىنشى كەزەكتە قولعا الىناتىن مەملەكەتتىك الەۋمەتتىك تولەمدەر دە بەلگىلى.

«تەستىلەۋ رەجيمى اياقتالعاننان كەيىن ىسكە قوسامىز جانە ازاماتتارعا الەۋمەتتىك ءاميان ارقىلى الەۋمەتتىك تولەم الۋدا تاڭداۋ جاساۋ مۇمكىندىگىن بەرەمىز. جۇمىس اياقتالا سالىسىمىن بۇكىل ەلگە حابارلايمىز ءارى الەۋمەتتىك ءامياندى قالاي قولدانۋعا بولاتىندىعىن تۇسىندىرەمىز. بۇل جۇيە ارقىلى الەۋمەتتىك تولەمدەرگە قاتىستى ۇلكەن سوماداعى قاراجات جۇرەتىن بولادى. سوعان وراي ءتيىستى ينفراقۇرىلىم كەرەك. ءاميانعا تۇسەتىن قاراجات جاراتىلۋى قاجەت. ادامدار وسى قۇرال ارقىلى ساۋدا ۇيلەرىندە، دۇكەندەردە تولەم جاساي الۋى ءتيىس. ال ول ءۇشىن دايىن ينفراقۇرىلىم كەرەك»، - دەدى ەربول وسپانوۆ.