پحەنچان وليمپياداسىندا چەمپيون اتانعان قازاق قىزىنا بەيجىڭدە جۇلدە بۇيىرمادى

نۇر-سۇلتان. قازاقپارات - بۇگىن بەيجىڭدە ءوتىپ جاتقان وليمپيا ويىندارىندا بياتلوننان ايەلدەر اراسىنداعى سپرينت جارىسىندا بەلارۋس اتىنان سىنعا ءتۇسىپ جۇرگەن قازاق قىزى دينارا الىمبەكوۆا جۇلدەدەن تىس قالدى، دەپ حابارلايدى قازاقپارات ءتىلشىسى.

دەگەنمەن ول ايەلدەر اراسىندا بياتلوننان 7,5 شاقىرىمدىق سپرينتتەن توپ-15 سپورتشىنىڭ قاتارىنا ەندى.

اتالعان سىندا جەرلەسىمىز گالينا ۆيشنيەۆسكايا-شەپورەنكو مارە سىزىعىن 52- بولىپ كەسكەنىن جازعان بولاتىنبىز.

اتالعان باسەكەدە بەلارۋس قۇراماسىنىڭ اتىنان سىنعا ءتۇسىپ جۇرگەن قانداسىمىز دينارا الىمبەكوۆا چەمپيوننان (1:28,5+) ءبىر جارىم مينۋت كەشىگىپ، جالپى ەسەپتە 15-ورىنعا تابان تىرەدى.

ەستەرىڭىزدە بولسا، دينارا الىمبەكوۆا وسىدان ءتورت جىل بۇرىن وڭتۇستىك كورەيانىڭ پحەنچان قالاسىندا وتكەن وليمپيادادا چەمپيون اتانعان بولاتىن. وندا ول چەمپيوندىق اتاققا بياتلوننان ايەلدەر اراسىنداعى 4x 6 شاقىرىمدىق ەستافەتا جارىسىندا قول جەتكىزگەن ەدى.

سول تۇستا بەلارۋس قۇراماسىندا دينارا الىمبەكوۆامەن بىرگە نادەجدا سكاردينو، يرينا كريۆكو جانە داريا دومراچيەۆا ەسىمدى سپورتشىلار سىنعا ءتۇستى.

دينارا الىمبەكوۆانىڭ اكەسى - قازاق، اتى - تالعات. شەشەسى - بەلارۋس. دينارا 1996-جىلى 5 - قاڭتاردا قاراعاندى قالاسىنىڭ ىرگەسىندەگى اباي اۋدانىندا دۇنيەگە كەلگەن. ءۇش جاسىندا بەلارۋس ەلىنە قونىس اۋدارعان سپورتشى قىز كىشكەنتاي كەزىنەن بياتلونمەن اينالىسادى.

اۆتور: كۇنسۇلتان وتارباي