باقتيار ارتايەۆ بوكس فەدەراتسياسىنداعى قىزمەتىنەن كەتتى

نۇر-سۇلتان. قازاقپارات - بەلگىلى بوكسشى، افينا وليمپياداسىنىڭ چەمپيونى، ۆەل باركەر كۋبوگىنىڭ يەگەرى باقتيار ارتايەۆ ق ر بوكس فەدەراتسياسىنىڭ ۆيتسە-پرەزيدەنتتىگىنەن جانە مەملەكەتتىك جاتتىقتىرۋشى قىزمەتىنەن كەتتى، دەپ حابارلايدى قازاقپارات ءتىلشىسى.

بۇل مالىمەتتى سپورتشىنىڭ ءوزى قازاقپارات تىلشىسىنە راستادى.

«قىزمەتتەن كەتىپ جاتقانىمدى راستايمىن. ءبىراق سەبەبى تۋرالى ازىرگە ەشتەڭە ايتا المايمىن»، - دەپ قىسقا قايىردى سپورت مەنەدجەرى.

باقتيار ارتايەۆ 1983-جىلى 14- ناۋرىزدا تاراز قالاسىندا تۋعان. بوكسپەن 10 جاسىنان باستاپ اينالىستى. 2004-جىلى گرەكيادا وتكەن وليمپيادا ويىندارىنىڭ شيرەك فينالىندا ەكى دۇركىن وليمپيادا چەمپيونى رەسەيلىك ولەگ سايتوۆتى جەڭدى.

ال فينالدا ارتايەۆ كۋبانىڭ ەكى دۇركىن الەم چەمپيونى لورەنتسو اراگوننان باسىم بولىپ، «التىننان» القا تاقتى.

«بارىس» وردەنىمەن ماراپاتتالعان. سوڭعى ءبىر جارىم جىل قازاقستان بوكس قۇراماسىنىڭ مەملەكەتتىك جاتتىقتىرۋشىسى قىزمەتىن اتقارىپ كەلدى.