قانشا تەڭگە بولىنەتىنى ءالى بەلگىسىز: مينيسترلىك جەڭىلدەتىلگەن اۆتونەسيە تۋرالى ءتۇسىندىردى

نۇر-سۇلتان. قازاقپارات - ق ر يندۋستريا جانە ينفراقۇرىلىمدىق دامۋ مينيسترلىگىنىڭ باسپا ءسوز حاتشىسى جەڭىلدىك اۆتونەسيەلەۋ باعدارلاماسى تۋرالى بۇرمالانىپ تاراعان اقپاراتقا تۇسىنىك بەردى، دەپ حابارلايدى قازاقپارات ءتىلشىسى.

ۆەدومستۆونىڭ باسپا ءسوز حاتشىسى جانجىگىت ومارحان بۇل تۋرالى Facebook پاراقشاسىندا جازدى.

ايتۋىنشا، جەڭىلدىكپەن اۆتونەسيەلەۋدىڭ جاڭا باعدارلامالارىن ازىرلەۋ بارىسى تۋرالى ايتىلعان اقپارات ب اق- تا ءسال بۇرمالانىپ كەتكەن.

«ق ر ي ي د م اۆتوموبيل جاساۋ باسقارماسىنىڭ باسشىسى رۋسلان حيسامۋتدينوۆ «حابار» تەلەارناسىنا سۇحبات بەرىپ، جەڭىلدىكپەن اۆتونەسيەلەۋدىڭ جاڭا باعدارلامالارىنىڭ جوبالارى تۋرالى اڭگىمەلەپ بەردى. وسى سۇحبات نەگىزىندە kolesa.kz پورتالى «جەڭىلدىكپەن اۆتونەسيەلەۋدىڭ جاڭا باعدارلاماسى. العاشقى مالىمەتتەر» دەگەن تاقىرىپپەن ماتەريال جاريالاپ، كەيىن ول وزگە دە اقپارات قۇرالدارىندا تاراتىلدى. بۇل رەتتە باستاپقى اقپارات ءسال بۇرمالانعان»، - دەپ جازدى ج. ومارحان.

مينيسترلىك وكىلىنىڭ سوزىنە قاراعاندا، ر. حيسامۋتدينوۆ ايتقان «ۇسىنىلادى»، «ازىرلەنەدى» جانە «پىسىقتالادى» دەگەن سوزدەردىڭ ورنىنا اۆتور «بولادى»، «ەرەكشەلەنەدى» سياقتى سوزدەردى قولدانعان.

سالدارىنان اقپاراتتى تۇتىنۋشىلار اۆتونەسيەلەۋدىڭ جاڭا باعدارلاماسى جاسالىپ، جاقىن ارادا ىسكە قوسىلادى دەپ قاتە ءتۇسىنىپ قالۋى ىقتيمال.

«ياعني، ءالى زەرتتەلىپ، پىسىقتالىپ جاتقان باستامالار قازىردىڭ وزىندە قابىلدانعان شەشىم رەتىندە جەتكىزىلگەن. وسىعان بايلانىستى قازىر ۋاكىلەتتى مەملەكەتتىك ورگاندار جەڭىلدىكپەن اۆتونەسيەلەۋدىڭ جاڭا باعدارلامالارىنىڭ 2 نۇسقاسىن قاراستىرىپ جاتقانىن ايتقىم كەلەدى. ءبىرىنشى نۇسقادا جەڭىلدىكتى نەسيەلەۋگە 4 جىلعا (ءبىرىنشى جىلعا - 30 ميلليارد) بولىنگەن 150 ميلليارد تەڭگە (ب ا ق- تا ايتىلعانداي 250 ميلليارد ەمەس) باعىتتاۋ قاراستىرىلۋدا. نەسيە بەرۋ شارتتارىن 2015-جىلدان ىسكە قوسىلعان ەسكى باعدارلامالارمەن بىردەي ەتىپ قالدىرۋ ۇسىنىلادى»، - دەپ جازدى جانجىگىت ومارحان.

ونىڭ مالىمەتى بويىنشا، ەكىنشى ۇسىنىلىپ وتىرعان نۇسقا حالىقتىڭ الەۋمەتتىك وسال توپتارىنا باستاپقى جارناسىز نەسيە بەرۋدى قاراستىرادى.

بۇعان دەيىن ق ر پرەمەر-ءمينيسترى اتاپ وتكەندەي، وعان «و ك م وپەراتورى» كومپانياسىندا جينالعان قاراجاتتان شامامەن 100 ميلليارد تەڭگە ءبولۋ ۇسىنىلادى.

«سونداي-اق، ءبىر ادامعا بەرىلەتىن نەسيە شەگىن 7 ميلليون تەڭگە قىلۋ باستاماسى تالقىلانىپ جاتىر. بۇل ۇسىنىس قابىلدانا ما، جوق پا، ول جاعى ەكونوميكالىق تيىمدىلىگى مەن ماقساتىنا بايلانىستى ايقىندالادى. قالاي بولعاندا دا، ەكى نۇسقا دا قازىرگى ۋاقىتتا مەجەسىنە جەتكەن جوق. ولار ق ر ي ي د م ۇسىنعان تۇردە قابىلدانباۋى دا مۇمكىن. سوندىقتان ناقتى شەشىمدەر تۋرالى ايتۋعا ءالى ەرتە. جالپى العاندا، 2022-جىلى بارلىق قۇجاتتىق جانە زاڭدىق پروتسەستەرى اياقتالعاندا جەڭىلدىكپەن اۆتونەسيەلەۋدىڭ جاڭا باعدارلاماسى ىسكە قوسىلادى»، - دەيدى ۆەدومستۆونىڭ باسپا ءسوز حاتشىسى.