قازاقستاندا قانشا نەمىس تۇرىپ جاتىر
بۇل تۋرالى ق ر سىرتقى ىستەر ءمينيسترىنىڭ ورىنباسارى رومان ۆاسيلەنكو ءمالىم ەتتى، دەپ حابارلايدى قازاقپارات ءتىلشىسى.
«قازاقستان مەن گەرمانيا قارىم-قاتىناسى ساياسي بەلسەندى بايلانىس جانە ساۋدا-ينۆەستيتسيالىق جوبالار ارقىلى مىعىم. سونداي-اق ادامي ولشەمنىڭ ماڭىزدى الەۋەتىمەن دە ەرەكشەلەنەدى. ەلىمىز ⅩⅩ عاسىردىڭ باسىندا ولكەمىزگە كەلە باستاعان مىڭداعان نەمىس ءۇشىن ەكىنشى وتانىنا اينالدى. ال ەدىل بويىنداعى نەمىستەردى قايعىلى ستاليندىك دەپورتاتسيالاعاننان كەيىن ەلىمىزدەگى نەمىستەردىڭ سانى 1 ميلليونعا دەيىن ءوستى. ءبىز ءارقاشان قازاقستاننىڭ ءبىرتۇتاس حالقىنىڭ اجىراماس بولىگىنە اينالعان نەمىس وتانداستارىمىزدىڭ ەڭبەكسۇيگىشتىگى مەن تاتۋ كورشىلىگىنە زور قۇرمەتپەن قارايمىز. بۇگىندە گەرمانيادا 1 ميلليونعا جۋىق قازاقستاندىق تۇرىپ جاتىر. ونىڭ ىشىندە ءبىزدىڭ ەلدە تۇرىپ، كەيىن تاريحي وتانىنا كوشكەندەر دە بار. ال بىزگە كەلسەك، قازاقستاندا 200 مىڭعا جۋىق نەمىس حالقى ءومىر ءسۇرىپ جاتىر»، - دەدى ر. ۆاسيلەنكو.
ۆيتسە-ءمينيستردىڭ مالىمدەۋىنشە، ىشكى ەكونوميكانى ىلگەرىلەتۋدە گەرمانيا ءوز ۇلگىسىمەن ەرەكشەلەنەدى.
«وتكەن جىلدىڭ قىركۇيەك ايىندا نۇر-سۇلتاندا قازاق-گەرمان ورتالىعى اشىلدى. ونداعى ماقسات - قازاقستانداعى نەمىس ەتنوسىن شوعىرلاندىرۋ جانە جان-جاقتى قولداۋ. سونداي-اق قازاقستان مەن گ فر اراسىنداعى مادەني-گۋمانيتارلىق ىنتىماقتاستىقتى ودان ءارى دامىتا ءتۇسۋ. قورىتىندىلاي كەلە، سەنىم مەن ءوزارا تۇسىنىستىككە نەگىزدەلگەن جەمىستى ىنتىماقتاستىق ءۇشىن نەمىس دوستارىمىزعا، ارىپتەستەرىمىزگە جانە سەرىكتەستەرىمىزگە ريزاشىلىعىمدى بىلدىرەمىن. جانە ديپلوماتيالىق قارىم-قاتىناستىڭ 30 جىلدىعىمەن تاعى دا قۇتتىقتايمىن!»، - دەدى ول.
