قازاقستاننىڭ باتىسى مەن ورتالىعىندا جەل جانە كۇن ەلەكتر ستانسياسى سالىنادى

نۇر- سۇلتان. قازاقپارات - ەلىمىزدىڭ باتىس جانە ورتالىق وڭىرلەرىندە نەمىس تەحنولوگياسى نەگىزىندە كۇن جانە جەل ەلەكتر ستانسياسى جوباسى قولعا الىنباق.

بۇل تۋرالى ق ر سىرتقى ىستەر ءمينيسترىنىڭ ورىنباسارى رومان ۆاسيلەنكو ءمالىم ەتتى، دەپ حابارلايدى قازاقپارات ءتىلشىسى.

«نەمىس كاپيتالىنىڭ قاتىسۋىمەن 600-دەن استام كاسىپورىن تابىستى جۇمىس ىستەپ جاتىر. ءبىزدىڭ ەلىمىزگە نەمىس كومپانيالارىنىڭ قىزىعۋشىلىعى ارتا تۇسۋدە. سوڭعى 15 جىلدا گەرمانيادان قازاقستانعا كەلىپ تۇسكەن تىكەلەي ينۆەستيتسيالار 5,3 ميلليارد دوللار قۇرادى. ونىڭ باسىم بولىگى (شامامەن % 80) شيكىزاتتىق ەمەس سەكتورعا، اۋىل شارۋاشىلىعى، قۇرىلىس، دەنساۋلىق ساقتاۋعا، كولىك لوگيستيكاسىنا باعىتتالدى»، - دەدى رومان ۆاسيلەنكو مينيسترلىكتە وتكەن باسپا ءسوز ءماسليحاتىندا.

ونىڭ ايتۋىنشا، بۇگىندە ساران قالاسىندا نەمىستىڭ «Goldbeck Solar» اتتى فيرمانىڭ قاتىسۋىمەن ورتالىق ازياداعى ءىرى، قۋاتى 100 مەگاۆاتتىق كۇن ەلەكتر جوباسى ىسكە قوسىلدى.

«جاقىن ارادا «SVEVIND» درەزدەن كومپانياسى باتىس جانە ورتالىق قازاقستاننىڭ دالاسىندا جالپى قۋاتى 45 گيگاۆاتت جەل جانە كۇن ەلەكتر ستانسيالارىن سالۋ بويىنشا ءىرى جوباعا كىرىسەدى. قازاقستان - نەمىس كاسىپكەرلەرى مەن ينۆەستورلارى ءۇشىن جاڭا مۇمكىندىكتەر مەكەنى، الەۋەتى جوعارى. ەكىجاقتى ينۆەستيتسيالىق احۋالدى جەتىلدىرە ءتۇسۋ ارقىلى ورتاق جەتىستىكتە قول جەتكىزەتىنىمىزگە سەنىمدىمىن»، - دەدى ول.

اۆتور: ءالي يبرايەۆ