ەلوردا ءماسليحاتىندا ۇيلەردى گازعا قوسۋدىڭ كەمشىلىكتەرى ايتىلدى
اتاپ ايتقاندا، قالالىق ءماسليحاتتا اۋداندار بەلسەندىلەرىنىڭ قاتىسۋىمەن «قازترانس گازايماق» ا ق ەلوردا وندىرىستىك فيليالىنىڭ قالانى گازداندىرۋ بارىسى تۋرالى ەسەبى تىڭدالدى.
«كەزدەسكەن ادامداردىڭ كوبىسى ۇيگە گاز تارتۋ ءراسىمى وتە كۇردەلى ەكەنىن ايتىپ جاتىر. تۇرعىنداردىڭ وسى ءۋاجىن كومپانيا وكىلدەرىنە قايتالاپ جەتكىزىپ وتىرمىن. نەگە وسىنداي جاعداي قالىپتاستى؟ تۇرعىنداردىڭ شاعىمىنان كەيىن الماتىعا جانە باسقا دا قالالارداعى ارىپتەستەرىمە تەلەفون شالىپ، ءمان- جايدى ءبىلدىم. ولاردا وسىنداي شەكتەن تىس تالاپتار جوق، تۇرعىندار قالىپتى تۇردە ۇيىنە گاز تارتىپ جاتىر. بىزدە جاپسارلاس سالىنعان جانە باسقا دا قۇرىلىستارعا تەحپاسپورت تالاپ ەتەدى. بۇلاي ىستەۋگە بولمايدى. تۇرعىن ءۇيدىڭ وزىنە قۇجات بەرىلدى عوي، سول جەتكىلىكتى»، - دەدى ە. كاناليموۆ.
وسى ورايدا ول قاجەت بولعان جاعدايدا تالاپتارعا تۇزەتۋ ەنگىزۋ كەرەك ەكەنىن اتاپ ءوتتى.
«بۇل - سىزدەردىڭ ىشكى قۇجاتىڭىز، اكسيونەرلىك قوعامنىڭ قانداي دا ءبىر قاعيدالارى دا بولۋى مۇمكىن. ەگەر ول تۇرعىنداردىڭ گازعا جاپپاي قوسىلۋىنا كەدەرگى بولسا، بۇل پۋنكتەردى وزگەرتۋ باستاماسىمەن شىعايىق. وزدەرىڭىز ءبىر ەرەجەلەردى ويلاپ تاۋىپ العاندىقتان، ادامدار ۇيىنە دەيىن تارتىلعان گازعا قوسىلا الماي اۋرە بولىپ ءجۇر. ءۇيدىڭ ماڭىنداعى قۇرىلىستىڭ زاڭداستىرىلماعانى، جازعى اس ءۇيدىڭ كەيىن سالىنعانى سياقتى سىلتاۋلارعا سۇيەنىپ، گاز تارتىلماي جاتىر. مۇنىڭ ءبارى سونشالىقتى كەدەرگى بولماۋى ءتيىس. وزدەرىڭىز وسىنداي كەدەرگىلەردى قولدان جاساپ العانسىزدار»، - دەدى ءماسليحات حاتشىسى كومپانيا وكىلىنە قاراتا ايتقان سوزىندە.
ءوز كەزەگىندە جاۋاپتى ماماندار ءتيىستى زاڭنامادا قۇجاتتار ءتىزىمى بار ەكەنىن جانە اتالعان پۋنكتەردى الىپ تاستاۋ كەرەك ەكەنىن اتاپ ءوتتى. «بۇگىن وسى جيىننان كەيىن الماتىداعى ارىپتەستەرمەن بايلانىسقا شىعىپ، وسى ماسەلە قالاي شەشىلگەنىن انىقتاپ الۋلارىڭىزدى سۇرايمىن. ولاردىڭ تاجىريبەسىن قولدانۋ كەرەك، الماتىدا جاعداي دۇربەلەڭسىز شەشىلىپ جاتىر. ياعني، وندا ۇيلەردى گازعا قوسۋ قارقىندى جۇرەدى»، - دەدى ە. كاناليموۆ.
اۆتور: رۋسلان عابباسوۆ
