ۇلتتىق مۋزەيگە بولعان انانىڭ جاڭعىرتىلعان بەينەسى قويىلدى

نۇر- سۇلتان. قازاقپارات - نۇر- سۇلتان قالاسىنداعى ۇلتتىق مۋزەيدە ۇلىتاۋ وڭىرىنەن اكەلىنگەن بولعان انانىڭ جاڭعىرتىلعان بەينەسى جانە باسقا دا جادىگەرلەر قويىلعان كورمە اشىلدى، دەپ حابارلايدى قازاقپارات ءتىلشىسى.

«بۇگىنگى كورمە ەرەكشە. سەبەبى قاسيەتتى سارىارقا تورىنەن قۇندى جادىگەرلەر اكەلىندى. بولعان انانىڭ جاڭعىرتىلعان كەيپى ءبىزدىڭ مۋزەيدە. وزدەرىڭىز بىلەتىندەي، مەملەكەت باسشىسى التىن وردانىڭ 750 جىلدىق مەرەيتويىن مەملەكەتتىك دەڭگەيدە اتاپ ءوتۋدى بەكىتتى. بۇگىنگى كورمە سول شارانىڭ اياسىندا ىسكە اسىپ وتىر. بولعان انا دەگەندە ءبىزدىڭ ويىمىزعا الدىمەن شىڭعىس حان كەلەدى. تاريحتان شىڭعىس حان ۇرپاقتارىنىڭ ۇلىتاۋدى مەكەندەگەنىن بىلەمىز. بۇگىنگى كورمەنى ۇيىمداستىرۋدا ۇلەس قوسقان ءار ازاماتقا العىسىمدى بىلدىرەمىن»، - دەدى ق ر ۇلتتىق مۋزەيىنىڭ ديرەكتورى ارىستانبەك مۇحامەدي ۇلى كورمەنىڭ اشىلۋىندا.

كورمەگە التىن توستاعان، سىرعا، ەر- توقىم، اينا، كەزدىك، جىبەكتەن تىگىلگەن شاپان جانە تاعى باسقا قۇندى زاتتار قويىلعان. جانە باستى جادىگەر - بولعان انانىڭ جاڭعىرتىلعان بەينەسى. كورمەنى ۇيىمداستىرۋشىلارىنىڭ ايتۋىنشا، بولعان انا كەسەنەسىندە ارحەولوگيالىق قازبا جۇمىسى 2018 -جىلى باستالعان.

«مەملەكەت باسشىسى ۇلىتاۋدىڭ تاريحى مەن تاعلىمىن ۇرپاق تاربيەسى مەن وتانشىلدىق جانە ىشكى تۋريزمدى دامىتا تۇسۋدە وڭ پايدالانۋ كەرەكتىگىن ايتقان ەدى. بۇگىن ءبىز قاراعاندى وبلىسى، ۇلىتاۋ اۋدانىنداعى بولعان انا كەسەنەسىنەن تابىلعان جادىگەرلەردى كوپشىلىك نازارىنا ۇسىنىپ وتىرمىز. سونداي- اق، بولعان انا بەينەسىنىڭ جاڭعىرتىلعان نۇسقاسىن دا اكەلىپ وتىرمىز. ءبىزدىڭ ماقسات - التىن وردا ءداۋىرىنىڭ تاريحىن كەڭىنەن ناسيحاتتاۋ. جانە ارحەولوگيالىق قازبا كەزىندە تابىلعان جادىگەرلەردى جۇرتشىلىق نازارىنا ۇسىنۋ»، - دەدى قاراعاندى وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى ەركەبۇلان جۇماكەنوۆ.

ايتۋلى شاراعا زيالى قاۋىم وكىلدەرى، قوعام قايراتكەرلەرى، ارحيۆ، كىتاپحانا، مۋزەي قىزمەتكەرلەرى مەن ستۋدەنتتەر قاتىستى.

اۆتور: ءالي يبرايەۆ