ۇيلەنۋ تويىنىڭ شىعىنىن ءوز موينىنا الاتىن مەملەكەت

نۇر- سۇلتان. قازاقپارات - بىرىككەن اراب امىرلىكتەرىنىڭ بيلىگى شاڭىراق كوتەرۋگە نيەتتەنگەن جاس جۇپتاردىڭ ۇيلەنۋ تويىنىڭ شىعىنىن ءوز موينىنا الاتىن بولدى.

ناقتىراق ايتقاندا، ۇكىمەت جانىنداعى Marriage Fund قورى 1992 - جىلدان بەرى ءوز الدىنا بولەك وتباسىن قۇرعىسى كەلەتىن ب ا ءا جاستارىنا 70 مىڭ ديرحام (19000 دوللار) شاماسىندا قايتارىمسىز قارجىلاي قولداۋ كورسەتىپ كەلەدى. مەملەكەت مۇنداي قادامعا ەل اۋماعىندا شەتەلدىك جۇمىسشىلاردىڭ كوبەيۋىنە بايلانىستى امىرلىك ارابتارىنىڭ ءوسىپ-ونۋىنە جاعداي جاساۋ ماقساتىندا بارىپ وتىر.

مۇنداي قولداۋعا يە بولۋى ءۇشىن جاس جۇپتارعا مىناداي شارتتار قويىلادى: كۇيەۋ جىگىت تە، قالىڭدىق تا امىرلىك ازاماتى بولۋى كەرەك، كۇيەۋ جىگىتتىڭ جاسى 21 دەن، ال قالىڭدىقتىڭ جاسى 18 دەن كەم بولماۋى ءتيىس، ەگەر جەسىر قالعان ايەلمەن ۇيلەنگىسى كەلسە، وندا ەر-ازامات ءۇشىن بۇل ءبىرىنشى نەكەسى بولۋى كەرەك.

تاياۋدا عانا قارجىلاي قولداۋعا يە بولاتىن جاس جۇپتاردىڭ جالاقىسىنا قاتىستى شەكتەۋ مولشەرى وزگەرتىلدى. بۇرىن تەك ايىنا 20 مىڭ ديرحام (5440 دولار) الاتىندار عانا مۇنداي قولداۋعا يە بولسا، ەندىگى جەردە ايىنا 25 مىڭ ديرحام (6800 دوللار) جالاقى الاتىندار دا وسىنداي قولداۋعا قول جەتكىزە الادى.