اقىلدى ايەل تۋرالى ءتامسىل
ەگىن ءتۇسىمىن ساتپاسا، وتباسىن اسىراي المايدى. سوندىقتان شارۋا سولعان المالاردى جيناپ، ارباعا سالىپ، بازارعا اپارىپ ساتاتىن بولىپ شەشتى. سۇيىكتى جارى جولىنا ساتتىلىك تىلەپ، ءبارى جاقسى بولاتىنىن ايتىپ، شىعارىپ سالدى. وعان جولشىباي كوپەس كەزدەسەدى. ارباسىنا قاراپ: - ەسىڭنەن اۋىسقانسىڭ با؟ بازارعا سولعان المالاردى الىپ بارا جاتقانىڭ نە؟ ونى ەشكىم دە ساتىپ المايدى، - دەپ سوگەدى.
- ءيا، بىلەمىن. ءبىراق باسقا امال قانشا؟ وسىلاردى ساتپاسام ايەلىمىز ەكەۋمىز اش قالامىز، - دەپ جاۋاپ بەرەدى وعان ديقان.
- بازاردان قۇر قول ورالعانىڭدا ايەلىڭدى كورەيىن. ءوزىڭدى ىشەك- قارنىڭمەن قوسا جەپ قويادى.
- ول ءۇشىن الاڭداماي- اق قويىڭىز، كوپەس. مەنىڭ ايەلىم التىن عوي. ول مەنى قانداي جاعداي بولسا دا قابىلدايدى ءارى سۇيەدى.
- ءدال وسى ەرتەگىڭە سەنە المايمىن، ازاماتىم. ونداي ايەل بولمايدى.
- بولعاندا قانداي؟ مەنىڭ ايەلىم التىن دەدىم عوي! كوپەس ويلانىپ تۇرىپ ديقانمەن باستەسۋدى ۇيعاردى.
- ولاي بولسا، باستەسەيىك. سەنىڭ ۇيىڭە بىرگە بارامىز دا، المانى ەشكىم ساتىپ المادى، قىستا ازىق قىلار تۇك جوق دەپ ايتامىز. ەگەر ايەلىڭ شىنىندا دا سەن ايتقانداي بولسا، مەن ساعان التىن تولى ءاميانىمدى بەرەمىن. ول بىرنەشە قىس بويى وتباسىڭدى اسىراۋعا جەتەدى. ال ەگەر وتىرىك ايتقان بولساڭ، ايەلىڭ ايقاي شىعارسا، سەن ۇتىلدىڭ، ماعان ارباڭدى اتىمەن قوسا بەرەسىڭ. قولدى اكەل.
- كەلىستىك! ءسويتىپ ولار شارۋانىڭ ۇيىنە كەلەدى. ايەلىنە مۇڭدى داۋىسپەن: - قۇرىدىق! المالاردى ساتا المادىم. قىس بويى اش وتىراتىن بولدىق! - دەيدى.
- مۇنىڭ نە، كوكەم- اۋ؟ نە ايتىپ تۇرسىڭ؟ ءوزىڭ امان- ساۋ كەلدىڭ، وسىنىڭ ءوزى ولجا. ونىڭ ۇستىنە جانىڭدا قوناعىڭ بار ەكەن. قوناق كەلسە، قۇت كەلەدى. كىرىڭدەر، جولدان شارشاپ كەلگەن شىعارسىڭدار. قارىندارىڭ دا اشقان بولار. قازىر داستارقان دايىنداپ جىبەرەيىن. تىنىعىپ، تاماقتانىڭدار، - دەپ تەز ارادا قۇمان اكەلىپ، قولعا سۋ قۇيادى.
كوپەس تاڭعالىپ وتىرسا دا، ادەيى ۇيىمداستىرىلعان قويىلىم دەگەن ويمەن سەنبەيدى. ۇزاعىراق قالا تۇرايىن، ول مىندەتتى تۇردە اشۋ شاقىرادى دەپ شەشتى. داستارقانعا دا جايعاستى. كوپەس اڭگىمەنى اينالدىرىپ اكەلىپ ساتىلماعان الماعا، قىستا قالاي كۇن كورەتىندەرىنە تىرەي بەردى. ال وعان ايەلى تەك: - ءبارى ورنىنا كەلەدى. بىردەڭە ەتىپ كۇنەلتەمىز. قازىر ەڭ باستىسى ەرىم مەن قوناعىمنىڭ كوڭىلى جاي بولعانى، - دەگەن جاۋاپتان تانبايدى.
كوپەس ۇتىلعانىنا كوزى جەتىپ، ءاميانىن شىعارادى دا: - مەن ومىردە ءتۇرلى ادام كوردىم. ءبىراق مۇنداي التىن ايەلدى كورمەپپىن. مىنە، اقشاڭدى ال. باقىتتى عۇمىر كەشىڭدەر! - دەيدى.
ەر ادام ءۇشىن ايەلدىڭ ماحابباتى جانە كەشىرىمدى بولۋى تاڭعاجايىپپەن پارا- پار. ايەلدىڭ ەنەرگەتيكاسى ەرىنىڭ كەشىرىلمەستەي قاتەلىكتەرىن دە تۇزەۋگە، جامانىن جاسىرىپ، جاقسىسىن اسىرۋعا قابىلەتتى. ەشكىم سەنبەسە دە، سوعىستان امان كەلۋىنە سەپ بولا الادى. مۇنىڭ بارلىعىن جاساۋ ءۇشىن ايەلگە كۇش بەرەتىن - ۇلى ماحاببات.
Massaget.kz
