وسكەمەندە ولگا رىپاكوۆانىڭ جۇلدەسىنە ارنالعان حالىقارالىق جارىس وتەدى

نۇر-سۇلتان. قازاقپارات - قازاقستاندا جەڭىل اتلەتيكادان وليمپيادا چەمپيونى ولگا رىپاكوۆانىڭ جۇلدەسىنە ارنالعان حالىقارالىق تۋرنير وتەدى، دەپ حابارلايدى قازاقپارات.

اتالعان حالىقارالىق تۋرنير 12-اقپان كۇنى باستالادى جابىق كەشەندە وتەتىن حالىقارالىق باسەكە وسكەمەندە جەڭىل اتلەتيكا مانەجىندە ۇيىمداستىرىلادى. اتالعان دودا قازاقستان قۇراماسى ءۇشىن جاڭا ماۋسىمداعى العاشقى جارىس بولىپ ەسەپتەلەدى.

ايتا كەتەيىك، ولگا رىپاكوۆا 1984 -جىلى 30-قاراشادا وسكەمەن قالاسىندا دۇنيە ەسىگىن اشقان. 2001 -جىلى شىعىس قازاقستان وبلىستىق دارىندى بالالارعا ارنالعان مەكتەپ- ينتەرناتىن بىتىرگەن. ول ءۇش قارعىپ سەكىرۋدەن 2012 -جىلى لوندوندا وليمپيادا چەمپيونى اتاندى. ال 2016 -جىلى ريودا قولا جۇلدەنى قانجىعاسىنا بايلادى. سونىمەن قاتار 2008 -جىلى بەيجىڭ وليمپياداسىنا قاتىسىپ ءتورتىنشى ورىن العان بولاتىن. كەيىن، وسى وليمپيادادا قولا جۇلدەگەر اتانعان گرەك سپورتشىسى حريسوپيا ديەۆەتسيدىڭ دوپينگ قولدانعانى انىقتالىپ، قازاقستاندىق سپورتشى رەسمي تۇردە تاعى دا بەيجىڭ وليمپياداسىنىڭ جۇلدەگەرى اتاندى.

وسىلايشا ولگا رىپاكوۆا قاتارىنان ءۇش وليمپيادا ويىندارىندا جۇلدە العان تۇڭعىش قازاقساندىق اتلەت اتاندى.

اۆتور: كۇنسۇلتان وتارباي