ۋتيليزاتسيالىق جيناقتىڭ مولشەرى قانشا بولۋى مۇمكىن؟

نۇر-سۇلتان. قازاقپارات – ق ر پرەزيدەنتى قاسىم-جومارت توقايەۆ وندىرۋشىلەر مەن دەستريۋبەتەرلەرگە اۆتوكولىكتەردى جانە اۋىل شارۋاشىلىعى تەحنيكاسىن حالىققا قولجەتىمدى ەتۋدى تاپسىردى.

سونداي-اق، بىرەۋدىڭ قاڭسىعىن تاڭسىق قىلىپ، ەسكى كولىكتەردى ەلگە كىرگىزۋگە جول بەرمەۋ كەرەكتىگىن اتاپ ءوتتى.

وتاندىق وندىرۋشىلەر پرەزيدەنتتىڭ باستاماسىن قولداپ وتىر. ولاردىڭ پىكىرىنشە قازاقستاندىقتار وتاندىق تەحنيكانى ساتىپ الۋ كەزىندە قوسىمشا شىعىندانبايدى. بىزدە قۇراستىرىلاتىن كولىكتەرگە تولەنەتىن ۋتيليزاتسيالىق جيناقتىڭ شىعىنىن مەملەكەت جاۋىپ بەرەدى. ياعني، بۇل تولەم اۆتوكولىكتىڭ قۇنىنا ەش اسەر ەتپەيدى. مەملەكەت باسشىسى «ۋتيليزاتسيالىق جيناقتىڭ قۇنى قايتا قارالاتىنىن» ايتتى. الايدا، بارلىق تاراپقا ءتيىمدى شەشىم قابىلداۋ كەرەكتىگىن ەسكەرتتى.

«كوبى ەۋرووداقتاعى ۋتيليزاتسيالىق جيناقتىڭ مولشەرىن ءجيى مىسالعا كەلتىرەدى. الايدا ءبىز ەۋرازيالىق ەكونوميكالىق وداقتىڭ شەڭبەرىندە جۇمىس ىستەيمىز. بۇل دۇنيەجۇزىلىك ساۋدا ۇيىمىنىڭ زاڭدىلىعى اياسىندا ىشكى نارىقتى تاريفتىك تۇرعىدان قولداۋ دەگەن ءسوز» - دەدى قازاقستان اۆتوبيزنەس اسسوتسياتسياسىنىڭ وكىلى قايرات ەلامانوۆ قازاقپاراتقا بەرگەن سۇحباتىندا.

«ءبىز ەۋرازيالىق ەكونوميكالىق وداقتىڭ ۋتيليزاتسيالىق جيناق مولشەرىن رەسەيمەن تەڭەستىرۋدى ۇسىنىپ وتىرمىز. سەبەبى بۇل وداق ىشىندەگى ەڭ ۇلكەن نارىق» - دەدى ق. ەلامانوۆ.

سونداي-اق، ول كەدەندىك باج سالىعى سياقتى ەمەس، ۋتيليزاتسيالىق جيناقتىڭ اقشاسى تولىقتاي قازاقستاندا قالاتىنىن اتاپ ءوتتى. قازاقستان ەلدە كولىك قۇراستىرۋ سالاسىن دامىتۋعا بار مۇمكىندىكتى جاساپ وتىر.

«ۋتيليزاتسيالىق جيناق سونىڭ ءبىر بولىگى. ەلدەگى وندىرىستە جەرگىلىكتى ءونىم ۇلەسىنىڭ ارتۋىن ىنتالاندىردى. ونى ەنگىزگەننەن كەيىن شيەۆرولە برەندىمەن دجەنەرال موتورس، كيا، حەندە، رەنو، كاماز بىزدە جۇمىس ىستەۋگە شەشىم قابىلدادى»، - دەدى ق. ەلامانوۆ.

ونىڭ مالىمەتى بويىنشا قازاقستان اۆتوپرومى ۇساق توراپتى قۇراستىرۋ ساتىسىنان ءوتىپ، كومپونەنتتەردى ءوندىرۋ كەزەڭىنە قادام باستى. قازىر بىرنەشە زاۋىتتىڭ قۇرىلىسى ءجۇرىپ جاتىر. 2021 -جىلى رەسمي ديللەرلەردە ساتىلعان جاڭا كولىكتەردىڭ %62,2 وتاندىق ءونىم. «ۋتيليزاتسيالىق جيناق ەنگىزىلگەننەن كەيىن قازاقستاندىق كولىكتەردىڭ ەكسپورتى 0 دەن 12 مىڭ داناعا دەيىن ءوستى. ولار رەسەي فەدەراتسياسىنا، وزبەكستان، بەلارۋس مەملەكەتىنە ساتىلۋدا»، - دەدى ق. ەلامانوۆ.

اسسوتسياتسيانىڭ مالىمەتى بويىنشا بىزدە 2021 -جىلى 92839 دانا اۆتوموبيل وندىرىلگەن. بۇل 2020 -جىلمەن سالىستىرعاندا %20 عا كوپ (77431 دانا). جۇك تارتقىشتاردى العاشقى تىركەۋ دەرەكتەرى بويىنشا 2021 -جىلدىڭ 9-ايىندا 104 Volvo ماركالى تارتقىش جانە 108 كاماز تىركەۋگە قويىلعان. ال، 2020 -جىلى - 284 Volvo تارتقىشى مەن 128 كاماز تىركەلگەن. 2016 -جىلى ۋتيليزاتسيالىق جيناقتى ەنگىزگەننەن كەيىن اۆتوپرومداعى تۇراقتى جۇمىسپەن قامتۋ %75 عا ءوستى. «قازىر اۆتوپروم كاسىپورىندارىندا 3,7 مىڭ ادام، قىزمەت كورسەتۋ، ساۋدا سياقتى سەكتورلارىندا 7 مىڭنان استام ادام جۇمىس ىستەيدى»، - دەدى اسسوتسياتسيا وكىلى.

ساراپشىلار ۋتيليزاتسيالىق جيناقتى ايتارلىقتاي ارزانداتۋ ەۋروپادان ەسكى كولىكتەردى تاسۋمەن اينالىساتىندار ءۇشىن عانا ءتيىمدى دەپ سانايدى. 2035 -جىلعا قاراي ەۋرووداق CO₂ گازىن شىعاراتىن اۆتوموبيلددەردى ءوز اۋماعىندا ساتۋعا تولىقتاي تىيىم سالۋى مۇمكىن. سوندىقتان وندىرۋشىلەر قازىردەن باستاپ وزگە ەلدەردەن جاڭا نارىق ىزدەستىرۋ ۇستىندە.

«قازاقستاندا وندىرىلەتىن كولىكتەر مەن اۆتوكولىكتى شەتەلدەن رەسمي يمپورتتايتىن كومپانيالارعا قاۋىپسىزدىك تۇرعىسىنان قويىلاتىن تالاپ وتە جوعارى. ال، شەكارا سىرتىنان كولىك تاسيتىن جەكە تۇلعالارعا قاۋىپسىزدىك جانە ەكولوگيالىق تالاپتار مۇلدە قويىلمايدى»، - دەدى ق. ەلامانوۆ.