ابزال قۇسپان: تەرگەۋ يزولياتورىنا تۇسكەن ازاماتتاردى قازىر ازاپتاپ جاتقان جوق

نۇر-سۇلتان. قازاقپارات - تەرگەۋ يزولياتورىنا سوتتىڭ سانكسياسىمەن تۇسكەن ازاماتتاردى ازاپتاپ جاتقان جوق.

بۇل تۋرالى «امانات» كومسيسسياسىنىڭ ءتوراعاسى ابزال قۇسپان ايتتى، دەپ حابارلايدى قازاقپارات ءتىلشىسى.

«ءبىزدىڭ تىكەلەي مىندەتىمىزگە كىرمەسە دە، تەرگەۋ يزولياتورىنا كىرگەن كەزدە شاعىم ايتقان ازاماتتاردىڭ ارىزدارىن جازىپ الىپ، ول بويىنشا باس پروكۋراتۋراعا 4 بەتتىك ۇسىنىسىمىزدى جەتكىزدىك. العاشقى ۇرىپ-سوعۋ ازاپتاۋ جاعدايلارى ۇستاۋ كەزىندە بولعان. 5-6-قاڭتار جاپپاي تارتىپسىزدىك بولسا، شامامەن، 8، 9، 10-قاڭتار ارالىعىندا جاپپاي ۇستاۋ شارالارى جۇرگىزىلدى. وسى كەزدە سونداي ارەكەتكە جول بەرىلدى، - دەدى ول ب ا ق وكىلدەرىنە ارنالعان بريفينگ بارىسىندا.

ونىڭ اتاپ وتۋىنشە، ۇستالعان كەزدە قۇقىق قورعاۋ ورگاندارى تاراپىنان ءجابىر كورگەن ازاماتتاردىڭ ءىسىن پروكۋراتۋرا مەن جەمقورلىققا قارسى قىزمەت تەكسەرەدى. الماتى قالاسى جانە وزگە وڭىرلەردە انتيكور تاراپىنان ىشكى ىستەر ورگاندارى قىزمەتكەرلەرىنە قاتىستى قوزعاعان قىلمىستىق ىستەر بار.

«تالدىقورعان قالاسىندا ازامات باتىربايەۆتىڭ قانداي جاعدايعا ۇشىراعانىن تاپتىشتەپ جازىپ بەرگەن ءبىزدىڭ كوميسسيا بولاتىن. ارقاسىنا ۇتىك باسقانىن، قانداي حالدە جاتقانىن مەرزىمدەرىمەن كورسەتتىك. ونداي جاعدايلاردى ءبىز اشىق ايتتىق. ولارعا قاتىستى باس پروكۋراتۋرا دا اسەر ەتىپ، جۇمىس ىستەپ جاتىر. قاماۋعا وق ءتيىپ جاراقات العان ازاماتتاردىڭ جاعدايى سول جەردە ءجىتى قارالدى. ءبىراق ءبىز ەڭ الدىمەن وسىنداي ساناتتى بوساتۋ ىستەرىمەن اينالىستىق. ال تەرگەۋ يزولياتورىنا سوتتىڭ سانكسياسىمەن تۇسكەن ازاماتتاردى ازاپتاپ جاتىر دەپ ايتا المايمىز. سەبەبى بىزگە تۇسكەن ارىز-شاعىمداردىڭ بارلىعى ۇستاۋ كەزىندە بولعانىن ايتادى»، - دەدى ادۆوكات.

اۆتور: مارلان جيەمباي