رەسەي تاعى دا دوپينگ داۋىنا قالدى

نۇر-سۇلتان.قازاقپارات - بەيجىڭدەگى وليمپيا ويىندارىندا باق سىناپ جاتقان رەسەي قۇراماسىنىڭ سپورتشىلارى تاعى دا دوپينگ داۋىنا ءىلىندى.

دۇيسەنبىدەگى جارىس كۇنىندە مانەرلەپ سىرعاناۋدان كوماندالىق سايىستا توپ جارعان رەسەيلىك سپورتشىلار التىن مەدالدارىنان ايىرىلۋى مۇمكىن. بۇل تۋرالى ايگىلى بريتانيالىق Inside the Games باسىلىمى مالىمدەدى.

7-اقپاندا مارەسىنە جەتكەن مانەرلەپ سىرعاناۋدان كوماندالىق جارىستا رەسەي قۇراماسىنىڭ سپورتشىلارى 74 ۇپاي جيناپ، وتە ۇلكەن باسىمدىقپەن جەڭىسكە جەتىپ ەدى. ەكىنشى ورىندى 65 ۇپايمەن ا ق ش وليمپياداشىلارى يەلەنسە، جاپونيا قۇراماسى 63 ۇپايمەن قولا جۇلدەنى قاناعات تۇتتى. رەسەي قۇراماسى ساپىنان كاميلا ۆاليەۆا (سۋرەتتە)، مارك كوندراتيۋك، اناستاسيا ميشينا، الەكساندر گاللياموۆ، ۆيكتوريا سينيتسينا جانە نيكيتا كاتسالاپوۆ وليمپيادا چەمپيونى اتاندى.

ءدال سول كۇنى جارىس جەڭىمپازدارى ماراپاتتالىپ، ولارعا تيەسىلى مەدالدار تاپسىرىلۋى كەرەك ەدى. الايدا حالىقارالىق وليمپيادا كوميتەتى (ح و ك) ماراپاتتاۋ راسىمىنە ەكى ساعات قالعاندا مەدال تاپسىرۋ سەيسەنبىگە، ال ءسال كەيىنىرەك بەلگىسىز ۋاقىتقا قالدىرىلعانىن مالىمدەدى.

ال كەشە Inside the Games باسىلىمى مانەرلەپ سىرعاناۋدان كوماندالىق ماراپاتتاۋ ءراسىمى رەسەي قۇراماسىنىڭ سپورتشىلارىنىڭ ءبىرىنىڭ دوپينگ تەستى وڭ ناتيجە كورسەتۋىنە بايلانىستى كەيىنگە قالدىرىلعانىن جازدى. ح و ك- تىڭ كوممۋنيكاتسيالار جونىندەگى ديرەكتورى مارك ادامستىڭ مالىمەتىنشە، ماراپاتتاۋ ءراسىمى وليمپيادانىڭ سوڭىنا دەيىن وتكىزىلۋى مۇمكىن. ءبىراق ول جەردە رەسەيلىك سپورتشىلاردىڭ بولۋ- بولماۋى بەلگىسىز ەكەنى ايتىلۋدا. قازىرگى تاڭدا ح و ك جانە حالىقارالىق شاڭعىشىلار وداعى (ISU) اراسىندا زاڭگەرلىك كونسۋلتاتسيالار ءجۇرىپ جاتىر.

سونداي- اق كەشە باتىس باسىلىمدارى كوماندالىق جارىستا ونەر كورسەتكەن رەسەيلىك سپورتشىلار كاميلا ۆاليەۆا، مارك كوندراتيۋك، اناستاسيا ميشينا جانە الەكساندر گاللياموۆ سارسەنبى كۇنگى جاتتىعۋ جيىندارىنا قاتىسپاعانىن جازدى. ءبىراق مۇنىڭ دوپينگ داۋىنا بايلانىستى ەكەنىنە ازىرشە ەشكىمدە ناقتى دالەل جوق.

رەسەيلىك باسىلىمداردىڭ مالىمەتىنشە، رەسەيدىڭ مانەرلەپ سىرعاناۋ فەدەراتسياسى دوپينگ داۋىنا بايلانىستى اقپاراتقا تۇسىنىكتەمە بەرۋدەن باس تارتقان. ال رەسەي قۇراماسىنىڭ دارىگەرى الەكساندر وزەروۆ بۇل مالىمەتتى جوققا شىعاردى. ەگەر رەسەيلىك مانەرلەپ سىرعاناۋشىلاردىڭ بىرىنەن تىيىم سالىنعان زات تابىلسا جانە ول راستالسا، وندا رەسەي قۇراماسى وليمپيادا التىنىنان ايىرىلادى.

10 -اقپاندا ب ا ق بەتتەرىندە كاميلا ۆاليەۆانىڭ تىيىم سالىنعان پرەپارات قولداندى دەگەن كۇدىككە ىلىنگەنى حابارلاندى. 15 جاستاعى قازان قالاسىنىڭ تۋماسى 2020 -جىلدان باستاپ ەرەسەكتەر اراسىنداعى جارىستاردا ونەر كورسەتە باستادى. سول جىلى ول رەسەي بىرىنشىلىكتەرىندە ۇزدىكتەر قاتارىنان كورىنىپ، 2021 -جىلى حالىقارالىق جارىستاردا دا بوي كورسەتتى. بىلتىر Rostelecom Cup 2021 جارىسىنىڭ ەكى باعدارلاماسىندا 272,71 ۇپاي جيناپ، الەم رەكوردىن ورناتتى. ال جۋىردا عانا تالليندە مارەسىنە جەتكەن ەۋروپا چەمپيوناتىندا توپ جارىپ، قىسقا باعدارلامادا دا 90,45 ۇپايمەن جاھان رەكوردىن جاڭارتقان ەدى.

ايتا كەتەيىك، كەيىنگى جىلدارداعى دوپينگ ەرەجەسىن ءجيى بۇزۋىنا بايلانىستى رەسەيدىڭ وليمپيادا كوميتەتى (ر و ك) حالىقارالىق وليمپيادا كوميتەتى تاراپىنان جازالانىپ، حالىقارالىق ءىرى جارىستاردا، اتاپ ايتقاندا، توكيو-2020 جانە بەيجىڭ-2022 وليمپيا ويىندارىندا مەملەكەتتىڭ اتى، تۋى جانە انۇرانىمەن ونەر كورسەتۋگە تىيىم سالعان ەدى. رەسمي جارىستاردا رەسەيلىكتەرگە رەسەيدىڭ وليمپيادا كوميتەتى جانە ونىڭ تۋى استىندا عانا جارىستارعا قاتىسۋعا رۇقسات بەرگەن. ال سپورتشىلاردىڭ قۇرمەتىنە ەلدىڭ ءانۇرانى ەمەس، چايكوۆسكيدىڭ مۋزىكاسى قويىلادى.

ءالي بيتورە

egemen.kz