قاسىم- جومارت توقايەۆ رەسەي ۇكىمەتىنىڭ ءتوراعاسى ميحايل ميشۋستينمەن كەزدەستى
كەزدەسۋ بارىسىندا قازاقستان مەن رەسەي پرەزيدەنتتەرىنىڭ بۇگىنگى كەلىسسوزدەرىنىڭ قورىتىندىسى بويىنشا قول جەتكىزىلگەن ۋاعدالاستىقتاردى جۇزەگە اسىرۋ ماسەلەلەرى تالقىلاندى، دەپ حابارلايدى اقوردانىڭ باسپا ءسوز قىزمەتى.
- ەلدەرىمىز اراسىنداعى ستراتەگيالىق سەرىكتەستىك پەن شىنايى وداقتاستىق قاتىناستاردى ىلگەرىلەتۋ ءۇشىن كوپ جۇمىس ىستەۋ كەرەك. بار كۇش- جىگەردى كۇن تارتىبىنە ەنگىزىلگەن ماسەلەلەر بويىنشا ناقتى ناتيجەلەرگە قول جەتكىزۋ ءۇشىن جۇمساۋ قاجەت. مەن جاڭا عانا ۆلاديمير ۆلاديميروۆيچپەن ۇزاق ءارى ءتيىمدى كەلىسسوز جۇرگىزدىم. ءبىز ىنتىماقتاستىعىمىزدى نىعايتۋعا، حالىقارالىق جانە وڭىرلىك جاعدايعا قاتىستى بارلىق ماسەلە بويىنشا سويلەستىك، - دەدى قاسىم- جومارت توقايەۆ.
مەملەكەت باسشىسى قازاقستاننىڭ جاڭا ۇكىمەتىمەن جۇيەلى جۇمىس ىستەۋدىڭ ماڭىزدى ەكەنىن اتاپ ءوتتى.
- سىزدەردىڭ وكىلدەرىڭىز بەن قازاقستاننىڭ جاڭا ۇكىمەتى اراسىنداعى بايلانىستارعا تىڭ سەرپىن بەرگىم كەلەدى. قارىم- قاتىناستار رەسەي ۇكىمەتىمەن اراداعى ىسكەرلىك، بەلسەندىلىك جانە وتە تىعىز بايلانىستاردى جالعاستىرۋعا باعىتتالۋى كەرەك، - دەدى پرەزيدەنت.
ونىڭ ايتۋىنشا، قازاقستان مەن رەسەيدىڭ كاماز، سيبۋر جانە باسقا دا جەتەكشى كومپانيالارىنىڭ قاتىسۋىمەن جۇزەگە اسىرىلىپ جاتقان ستراتەگيالىق سيپاتى زور ماڭىزدى بىرلەسكەن جوبالارى بار. بۇل جوبالار وندىرىستىك كووپەراتسيانى كەڭەيتۋگە، جاڭا جۇمىس ورىندارىن اشۋعا، ەكى ەلدىڭ ونەركاسىپتىك جانە تەحنولوگيالىق الەۋەتىن كۇشەيتۋگە باعىتتالعان. سونىمەن قاتار قازاقستان تاراپى ەۋرازيالىق ەكونوميكالىق وداق اياسىندا تىعىز ىقپالداستىق ورناتۋعا نيەتتى.
ءوز كەزەگىندە ميحايل ميشۋستين ەكى ەل اراسىنداعى دوستىق پەن ىنتىماقتاستىقتى دامىتۋ ءۇشىن قاسىم- جومارت توقايەۆتىڭ ماسكەۋگە جاساعان ساپارىنىڭ ماڭىزى زور ەكەنىن اتاپ ءوتتى.
- رەسەي فەدەراتسياسىنىڭ ۇكىمەتى جوعارى دەڭگەيدە قول جەتكىزىلگەن ۋاعدالاستىقتاردى ورىنداۋ ءۇشىن بارلىق قاجەتتى شارانى قابىلدايتىنىن مالىمدەيمىن، - دەدى ميحايل ميشۋستين.
كەزدەسۋ سوڭىندا قازاقستان پرەزيدەنتى ەكونوميكالىق كووپەراتسيانىڭ مەملەكەتتەرىمىز اراسىنداعى ىنتىماقتاستىقتىڭ ستراتەگيالىق ماقساتىنا ساي كەلەتىنىنە سەنىم ءبىلدىردى.
