تۇركى ەلدەرى تۋريستىك ءدالىز قۇرادى

نۇر – سۇلتان.قازاقپارات - بىركەلكى باعىت قىرعىزستاننان باستالىپ، تۇركىستاندا جالعاسادى. سوسىن وزبەكستان، تۇرىكمەنستان، ازەربايجان جانە تۇركياعا ويىسادى.

بۇل جوسپار الداعى بىرەر جىلدا ورىندالۋى ءتيىس. ازىرگە قۇزىرلى ورگاندار اراسىندا ءتيىستى كەلىسىم ءجۇرىپ جاتىر.

راۋان مىڭبايەۆ ءتىلشى:

- سامارقاننىڭ سان عاسىردان بەرگى سانىنە اينالعان ساۋلەت نىسانى ايگىلى ءامىر تەمىر سالدىرعان رەگيستان. الىستان «مەن مۇندالايدى». تۇتاس ءبىر ەلدىڭ جاۋھار جادىگەرى دەرسىز. سامارقاندا جىل 12 اي وسىنداي كۇن رايى. جايماشۋاق. جاز ايلارىندا ءتىپتى اپتاپ ىستىق. تۋريستەر ەڭ قولايلى مەزگىل دەپ كوكتەم مەن كۇزدى اتايدى. ال تۇركى ەلدەرىنىڭ رۋحاني استاناسى تۇركىستانعا كەلسەك، قالا قايتا تۇلەپ جاڭعىرعان. ءتاۋ ەتىپ باراتىن 50 گە تارتا كيەلى جەر بار.

راشيد ايۋپوۆ، تۇركىستان وبلىسى اكىمىنىڭ ورىنباسارى:

- قازىر بۇكىل الەمدە 0 ەرەجەسى دەگەن بار. ادامدار ءبىرىنشى بارىپ ۇيرەنگەن سوڭ سوعان قاراپ وتىرىپ ينفراقۇرىلىم قۇرىلادى. دومالاق انا، ارىستانباب، ۋكاش اتا بار، بارلىعىنا تارتىلدى. بۇگىنگى كۇندە ونىمەن عانا شەكتەلمەي، ءارى قاراي ادامداردىڭ كەلۋىنە جۇمىس جاساۋ كەرەك. ەجەلگى ساۋدا جولىنىڭ بويىندا ورنالاسقان بۇل قالالار جاڭا تۋريستىك ءدالىزدىڭ قۇرىلۋىنا سەپ. ساياحاتشىلار الدىمەن قىرعىزستانعا، كەيىن قازاقتىڭ ۇلى دالاسىمەن ءجۇرىپ، تۇركىستانعا بارادى. ودان ءارى سامارقان- بۇقارا ارقىلى تۇرىكمەنستان، ازەربايجان، تۇركياعا باعىت الادى. ءبىر ەرەكشەلىگى، ءدالىزدىڭ بويىندا ۆيزاسىز رەجيم قالىپتاسادى. ەركىن قارىم- قاتىناس ورنايدى.

ميرزوحيد ازيموۆ، تۇركى كەڭەسى ۇيىمى باس حاتشىسىنىڭ ورىنباسارى:

- وزبەكستان «تابارىك زياراتى» جوباسىن جۇزەگە اسىرۋدى ۇسىنادى. ول جەردە تۇركى ەلدەرىنىڭ ءتاۋ ەتىپ باراتىن ورىندارى جيناقتالادى. ءبىزدىڭ مەملەكەتتەردە بۇل باعىتتا الەۋەت كوپ. يسلام ءدىنىنىڭ وركەنيەتى وسىندا قالىپتاسقان. مۇنى ءتۋريزمنىڭ جاڭا ءتۇرى دەسەك بولادى. تۇركى ەلدەرىنىڭ قاي- قايسى دا جىل سايىن ميلليونداعان ساياحاتشى قابىلدايدى.

بىلتىر تۇركىستانعا بارعان تۋريستەر سانى 1 جارىم ميلليونعا جۋىقتادى. دەي تۇرعانمەن، تۋىستاس حالىقتاردىڭ بايلانىسى، ەجەلگى قالالار مەن ساۋلەت نىساندارى، تۇپتەپ كەلگەندە ورتاق تاريحى كەڭ ناسيحاتتالمايدى. ماسەلەن، «تۇركىستان- سامارقان- بۇقارا» باعىتى ءالى تانىمال ەمەس.

جاحانگەر سايدوۆ، وزبەكستاننىڭ تۋريزم مينيسترلىگىنىڭ دەپارتامەنت ديرەكتورى:

- ەركىن قارىم- قاتىناس ورناتۋ ءۇشىن ونلاين پلاتفورما ازىرلەپ جاتىرمىز. سول جەرگە بارلىق شاھار ەنگىزىلەدى. ۆيزا سۇرالمايتىن جاعداي جاسالادى. گيد قىزمەتى قاجەت ەتىلمەيدى. بيلەت، قوناقۇي تۋرالى مالىمەتتەر ەنگىزىلەدى. باۋىرلاس مەملەكەتتەردىڭ باسشىلارى بۇل باعىتتا بىرلەسكەن جوبالار ازىرلەۋ قاجەتتىگىن تاپسىردى. سونىڭ ناتيجەسىندە سامارقاندا ۇيىمداستىرىلعان جۇمىس توبىنىڭ وتىرىسىندا جاڭا ۇسىنىستار ايتىلىپ سارالاندى. ەندى ماسەلە مينيسترلەر دەڭگەيىندە تالقىلانادى. كەلەسى جيىن ازەربايجان استاناسى باكۋدە وتەدى دەگەن جوسپار بار.

راۋان مىڭبايەۆ، سانجار شاتۋلياگانوۆ

www.24.kz