قازاقستان رەسەيدىڭ حالىقارالىق اۋقىمدا قاۋىپسىزدىككە قاتىستى كەلىسسوز وتكىزۋ باستاماسىن قولدايدى
بۇل تۋرالى بۇگىن ماسكەۋدە رەسەي پرەزيدەنتى ۆلاديمير پۋتينمەن كەلىسسسوزدەردەن كەيىنگى بىرلەسكەن مالىمدەمە بارىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«وڭىرىمىزدەگى تۇراقتىلىق پەن قاۋىپسىزدىكتى قامتاماسىز ەتۋدە رەسەي فەدەراتسياسى بىرەگەي، ماڭىزدى رولگە يە. ءبىز رەسەيدىڭ ەۋرازيالىق كەڭىستىكتەگى قاۋىپسىزدىكتىڭ بولىنبەيتىندىگىنە قاتىستى ۇستانىمىن قولدايتىندىعىمىزدى اتاپ وتكىم كەلەدى. تۇپتەپ كەلگەندە، بۇل 2010-جىلى ە ق ى ۇ- نىڭ استانا فورۋمى قورىتىندىسىندا قول قويىلعان دەكلاراتسيادا بەكىتىلگەن. وزگە مەملەكەتتىڭ قاۋىپسىزدىگىنە نۇقسان كەلتىرە وتىرىپ، ءوزىڭنىڭ قاۋىپسىزدىگىڭدى قالىپتاستىرۋ قازىرگى الەمدە مۇمكىن ەمەستىگىمەن جانە دە مۇنىڭ ءىس جۇزىندە ءتيىمسىز ەكەندىگىمەن كەلىسەمىز»، - دەدى ق ر پرەزيدەنتى.
وسى رەتتە قاسىم-جومارت توقايەۆ رەسەي تاراپىنىڭ حالىقارالىق كەڭ اۋقىمدا قاۋىپسىزدىككە قاتىستى كەلىسسوز وتكىزۋ باستاماسى ءساتتى ديپلوماتيالىق كەلىسسوزدەر ءۇشىن وتە جاقسى پلاتفورما بولاتىنىن اتاپ ءوتتى.
«ءبىز كەلىسسوزدەردى كەلىسسوز وتكىزۋ ءۇشىن ەمەس، ناتيجەلەرگە قول جەتكىزۋ ءۇشىن وتكىزىلۋىن قولدايمىز. تۇپتەپ كەلگەندە «جاقسى داۋدان ناشار ءبىتىم ارتىق»، - دەپ تۇيىندەدى ءسوزىن مەملەكەت باسشىسى.
