رەسەيمەن ارىپتەستىك قازاقستانداعى ءبىلىم سالاسىنىڭ دامۋىنا ەلەۋلى ۇلەس قوسادى - پرەزيدەنت
ق ر پرەزيدەنتى قاسىم-جومارت توقايەۆ رەسەيلىك ارىپتەسى ۆلاديمير پۋتينمەن وتكەن كەلىسسوزدەردەن كەيىنگى بىرلەسكەن مالىمدەمەسىندە وسىلاي دەدى، دەپ حابارلايدى قازاقپارات ءتىلشىسى.
ونىڭ ايتۋىنشا، ەكى ەل اراسىنداعى ءوزارا ءتيىمدى ساۋدانىڭ ۇلەسى 70 پايىزعا جۋىقتاعان.
«قازاقستان مەن رەسەيدىڭ ءونىمدى سەرىكتەستىگى جاڭا يننوۆاتسيالىق وسىمدەر ەسەبىنەن ۇدايى كەڭەيىپ جاتىر. بۇگىن ەكى ەلدىڭ تسيرفلاندىرۋدىڭ، عارىشتى يگەرۋ مەن اتوم ەنەرگەتيكاسى سالاسىندا ماماندار دايارلاۋدىڭ وزەكتى ماسەلەلەرى بويىنشا ايتارلىقتاي العا جىلجۋىنا مۇمكىندىك بەرەتىن ءبىرقاتار قۇجاتتارعا قول قويىلدى»، - دەدى قازاقستان باسشىسى.
سونداي-اق، مەملەكەت باسشىسى كورشى ەلدىڭ تەحنيكالىق جوعارى وقۋ ورىندارىنىڭ الەۋەتىن بىزدەگى مامان تاپشىلىعىن شەشۋگە وڭتايلى پايدالانۋعا بولاتىنىن اتادى.
«قازاقستاندا ينجەنەرلىك-تەحنيكالىق بەيىندەگى جوعارى بىلىكتى مامانداردىڭ سۇرانىسقا يە ەكەنىن ەسكەرە وتىرىپ، ءبىلىم بەرۋ سالاسىنداعى ارىپتەستىككە ەرەكشە ءمان بەرىلدى. مەن بۇگىنگى كەلىسسوزدەر بارىسىندا قۇرمەتتى ۆلاديمير ۆلاديميروۆيچكە رەسەي فەدەراتسياسىنىڭ ەڭ تانىمال جوعارى وقۋ ورىندارىنىڭ، ءبىرىنشى كەزەكتە، تەحنيكالىق جوعارى وقۋ ورىندارىنىڭ فيليالدارىن قازاقستانعا باعىتتاۋعا كەلىسكەنى ءۇشىن ريزاشىلىق ءبىلدىردىم. مەن بۇل فيليالدار ءبىزدىڭ ەلدەگى ءبىلىم سالاسىنىڭ دامۋىنا ەلەۋلى ۇلەس قوسادى دەپ ويلايمىن»، - دەدى قاسىم-جومارت توقايەۆ.
ايتا كەتەيىك، رەسەي فەدەراتسياسىنىڭ استاناسىندا ق ر پرەزيدەنتى قاسىم-جومارت توقايەۆ پەن ر ف پرەزيدەنتى ۆلاديمير پۋتين كەلىسسوز جۇرگىزدى.
مەملەكەت باسشىسىنىڭ رەسەيگە جۇمىس ساپارى اياسىندا ءبىرقاتار قۇجاتقا قول قويىلدى.
