رەسەيمەن بىرلەسكەن ينۆەستيتسيالىق جوبالار جەكە باقىلاۋىمدا بولادى - قازاقستان پرەزيدەنتى

ماسكەۋ. قازاقپارات - قازاقستان اۋماعىندا رەسەيلىك ينۆەستيتسيانىڭ قاتىسۋىمەن ىسكە اسىرىلاتىن جوبالار جەكە باقىلاۋىمدا بولادى.

قازاقستان باسشىسى قاسىم-جومارت توقايەۆ رەسەيلىك ارىپتەسى ۆلاديمير پۋتينمەن وتكەن كەلىسسوزدەردەن كەيىنگى بىرلەسكەن مالىمدەمەسىندە وسىلاي دەدى، دەپ حابارلايدى قازاقپارات ءتىلشىسى.

«ءبىز وندىرىستىك كووپەراتسيانى كەڭەيتۋ كەلەشەگىن ەگجەي-تەگجەيلى تالقىلادىق. بۇل باعىتتا ءبىزدىڭ ەلدەر 13 ءىرى جوبانى اياقتادى. جالپى سوماسى 2,5 ميلليارد دوللاردان اساتىن 8 جوبا ىسكە اسىرۋ ساتىسىندا. تاعى 11 جوبا پىسىقتالۋدا. جالپى ينۆەستيتسيا كولەمى 1,5 ميلليارد دوللاردى قۇرايدى. كەلىسسوزدەر بارىسىندا قۇرمەتتى ۆلاديمير ۆلاديميروۆيچكە وسى جوبالاردىڭ بارلىعى مەنىڭ جەكە باقىلاۋىمدا بولاتىنىن جانە ولار جاڭا جۇمىس ورىندارىن قۇرۋعا، ەلدەرىمىزدىڭ ونەركاسىپتىك، تەحنولوگيالىق الەۋەتىن نىعايتۋعا باعىتتالاتىنىن جەتكىزدىم»، - دەدى قاسىم-جومارت توقايەۆ.

ايتا كەتەيىك، رەسەي فەدەراتسياسىنىڭ استاناسىندا ق ر پرەزيدەنتى قاسىم-جومارت توقايەۆ پەن ر ف پرەزيدەنتى ۆلاديمير پۋتين كەلىسسوز جۇرگىزدى.