توقايەۆ پۋتينمەن كەزدەسۋى جونىندە: كەلىسسوزدەر مازمۇندى ءارى قىزىقتى ءوتتى

نۇر-سۇلتان. قازاقپارات - قازاقستان پرەزيدەنتى قاسىم-جومارت توقايەۆ رەسەيلىك ارىپتەسى ۆلاديمير پۋتينمەن وتكەن كەلىسسوزدەرگە كوڭىلى تولعانىن ءمالىم ەتتى، دەپ حابارلايدى قازاقپارات ءتىلشىسى.

«ءبىرىنشى كەزەكتە مەن رەسەي فەدەراتسياسىنىڭ پرەزيدەنتىنە ماسكەۋگە رەسمي ساپارمەن ىزەت ءبىلدىرىپ شاقىرعانى ءۇشىن العىس ايتقىم كەلەدى. جاڭا عانا ءبىز ءبىرازعا سوزىلعان كەلىسسوزدەردى اياقتادىق. ول كەلىسسوزدەر كەزىندە قول جەتكىزىلگەن كەلىسىمدەر تۋرالى سىزدەرگە قۇرمەتتى ۆلاديمير ۆلاديميروۆيچ پۋتين مازمۇندى اقپارات بەردى. شىنىمەن دە كەلىسسوزدەر وتە مازمۇندى بولدى. مەن قىزىقتى بولدى دەپ ايتار ەدىم. مۇمكىندىكتى پايدالانىپ، وسى كەلىسسوزدەردىڭ ءوتۋ بارىسىنا قاناعاتتانعانىمدى بىلدىرگىم كەلەدى»، - دەدى قازاقستان باسشىسى.

ايتا كەتەيىك، رەسەي فەدەراتسياسىنىڭ استاناسىندا ق ر پرەزيدەنتى قاسىم-جومارت توقايەۆ پەن ر ف پرەزيدەنتى ۆلاديمير پۋتين كەلىسسوز جۇرگىزدى.

مەملەكەت باسشىسىنىڭ رەسەيگە جۇمىس ساپارى اياسىندا ءبىرقاتار قۇجاتقا قول قويىلدى.