وليمپياداعا قاتىسقان ءبىر توپ قازاقستاندىق سپورتشى ەلگە ورالدى

نۇر-سۇلتان. قازاقپارات - بۇگىن باس قالامىزدىڭ حالىقارالىق اۋەجايىنا بەيجىڭدە ءوتىپ جاتقان قىسقى وليمپياداعا قاتىسۋشىلار - فريستايل-موگۋلدان قازاقستان ۇلتتىق قۇراماسى ۇشىپ كەلدى، دەپ حابارلايدى قازاقپارات مادەنيەت جانە سپورت مينيسترلىگىنە سىلتەمە جاساپ.

سپورتشىلاردى مادەنيەت جانە سپورت مينيسترلىگىنىڭ وكىلدەرى مەن جانكۇيەرلەر قارسى الدى.

«سپورت - باق پەن باپ قاتار جۇرەتىن سالا. ءتورت جىلدا ءبىر كەلەتىن ءدۇبىرلى دودادا بار كۇشتەرىڭىزدى سالىپ، جىگەرلەرىڭىزدى كورسەتتىڭىزدەر. ءبىز سىزدەردى قاشاندا قولداۋعا دايىنبىز. جارقىن جەڭىستەرىڭىزدىڭ ءالى دە الدا ەكەندىگىنە سەنىمىمىز مول» - دەدى ق ر م س م سپورت جانە دەنە شىنىقتىرۋ ىستەرى كوميتەتى ءتوراعاسىنىڭ ورىنباسارى ايگۇل بەكتەنوۆا.

ەستەرىڭىزگە سالا كەتەيىك، بايراقتى باسەكەدە فريستايل-موگۋلدا ۇلتتىق قۇراما ساپىندا التى سپورتشى ەل نامىسىن قورعادى.

ولاردىڭ قاتارىندا يۋليا گالىشەۆا مەن دميتري رەيحەرد فينالعا جولداما الىپ، يۋليا ون ءبىرىنشى، ال دميتري سەگىزىنشى ورىنعا جايعاستى.