«زەينەتاقى جيناعىنان اقشا شىعارىپ بەرەمىز»: ب ج ز ق الاياقتار تۋرالى ەسكەرتتى

نۇر-سۇلتان. قازاقپارات - ءبىرىڭعاي جيناقتاۋشى زەينەتاقى قورى سالىمشىلاردى الاياقتىقتىڭ جاڭا تۇرىنەن ساق بولۋعا شاقىردى، دەپ حابارلايدى قازاقپارات ءتىلشىسى.

ب ج ز ق سالىمشىلارى وزدەرىن قور قىزمەتكەرى رەتىندە تانىستىرعان الاياقتارعا الدانىپ جاتقانىن ءمالىم ەتۋدە.

«ولار اقشاسىن تولەسەڭىز، زەينەتاقى جيناقتارىن تۇرعىن ۇيگە نەمەسە ەمدەلۋگە الىپ بەرۋگە كومەكتەسەمىز دەپ ۋادەنى ءۇيىپ توككەن. قوردىڭ 30 عا جۋىق سالىمشىسى وسى زاڭسىز ارەكەتتەردىڭ قۇربانى بولدى. بۇدان باسقا، الەۋمەتتىك جەلىلەر مەن مەسسەندجەرلەردە جىلجىمايتىن مۇلىكتى زەينەتاقى جيناقتارى ەسەبىنەن تۇتىنۋ كووپەراتيۆتەرى نەمەسە وزگە دە كومپانيالار ارقىلى ساتىپ الۋ تۋرالى جالعان اقپارات تاراتىلۋدا»، - دەپ جازادى قوردىڭ باسپا ءسوز قىزمەتى.

ب ج ز ق ماماندارى زەينەتاقى جيناعىنداعى جەتكىلىكتىلىك مولشەرىنەن ارتىلعان اقشانى تۇرعىن ءۇي جاعدايىن جاقسارتۋ ءۇشىن دە، ەمدەلۋ ءۇشىن دە تەك ق ر ۇكىمەتىنىڭ قاۋلىسىمەن بەكىتىلگەن ۋاكىلەتتى وپەراتورلار ارقىلى عانا ەلەكتروندىق فورماتتا راسىمدەۋگە بولاتىنىن ەسكەرتەدى.

زەينەتاقى جيناقتارىنىڭ ءبىر بولىگىن تۇرعىن ءۇي جاعدايىن جاقسارتۋعا پايدالانۋ ءۇشىن «وتباسى بانك»، «قازاقستان حالىق بانكى» ا ق، «Altyn Bank» ا ق، «بانك سەنتركرەديت» ا ق جانە «بانك فريدوم فينانس قازاقستان» ا ق سياقتى وپەراتورلار ارقىلى ءوتىنىش راسىمدەۋگە بولادى.

ال زەينەتاقى جيناقتارىن ەمدەۋگە پايدالانۋ ءۇشىن «وتباسى بانككە» عانا جۇگىنۋ كەرەك.

«ب ج ز ق تۇرعىندارعا زەينەتاقى جيناقتارىن پايدالانۋ ءۇشىن ءۇشىنشى تۇلعالارعا جۇگىنبەۋگە، كۇدىكتى سىلتەمەلەر ارقىلى بەيتانىس سايتتارعا وتپەۋگە كەڭەس بەرەدى. ءارى اقپاراتتى تەك enpf.kz سايتىنان نەمەسە ب ج ز ق- نىڭ الەۋمەتتىك جەلىلەردەگى رەسمي پاراقشالارىنان عانا تەكسەرۋ كەرەكتىگىن ەسكەرتەدى»، - دەپ جازىلعان قوردىڭ رەسمي مالىمەتىندە.