عالىمدار پاراتسەتامولدىڭ ولىمگە اكەلەتىن قاۋپىن انىقتادى

نۇر-سۇلتان. قازاقپارات - ەدينبۋرگ ۋنيۆەرسيتەتىنىڭ ماماندارى زەرتتەۋ جۇرگىزىپ، پاراتسەتامولدى ۇزاق ۋاقىت قولدانۋ قان قىسىمى جوعارى ناۋقاستاردا جۇرەك اۋرۋى مەن ينسۋلتتىڭ بولۋىن ارتتىراتىنىن انىقتادى.

بۇل تۋرالى ر ي ا نوۆوستي جازدى.

زەرتتەۋگە جوعارى قان قىسىمى بار 110 ەرىكتى قاتىستى. ەكى اپتا بويى ولاردىڭ ءبىر توبى كۇنىنە ءتورت رەت پاراتسەتامول، ال ەكىنشى توپ پلاتسەبو ىشكەن. ەمنىڭ ەكى ءتۇرىن دە پاتسيەنتتەر راندومدى تۇردە، بىلمەي قابىلدادى.

سونىمەن قاتار، قاتىسۋشىلاردىڭ ۇشتەن ەكىسى گيپەرتونياعا قارسى پرەپاراتتاردى دا ىشكەن. ناتيجەسىندە، ولاردىڭ قان قىسىمى جوعارىلاعانى انىقتالدى.

ساراپشىلاردىڭ پىكىرىنشە، پاراتسەتامولدى ۇنەمى قولدانۋ جۇرەك اۋرۋى نەمەسە ينسۋلت قاۋپىن شامامەن 20 پايىزعا ارتتىرادى. ادامدار پرەپاراتتى قابىلداۋدى توقتاتقاننان كەيىن ولاردىڭ قان قىسىمى زەرتتەۋدىڭ باسىندا بولعان دەڭگەيگە ورالدى.

بۇرىن بەلگىلى بولعانداي، پاراتسەتامولدى قابىلداۋ باۋىر اۋرۋىن كۇشەيتەتىنى جانە تەرى بورتپەسى تۇرىندە اللەرگيالىق رەاكتسيا تۋدىرۋى مۇمكىن ەكەنى ايتىلعان بولاتىن.

پاراتسەتامول، سونداي-اق اتسەتامينوفەن رەتىندە بەلگىلى، اۋرۋدى باسۋ ءۇشىن كەڭىنەن قولدانىلادى. پرەپارات دۇنيەجۇزىلىك دەنساۋلىق ساقتاۋ ۇيىمىنىڭ ماڭىزدى دارىلىك زاتتار تىزىمىنە ەنگىزىلگەن.

بۇعان دەيىن عالىمدار جۇكتىلىك كەزىندە پاراتسەتامولدى قابىلداۋ بالانىڭ اۋتيزمگە جانە نازار اۋدارۋ تاپشىلىعىنىڭ گيپەراكتيۆتىلىگىنە (ADHD) شالدىقتىراتىنىن انىقتاعان بولاتىن.