سەناتور: تابىسى تومەن تۇرعىنداردىڭ جاعدايىن جاقسارتۋ - بۇگىنگى كۇننىڭ باستى مىندەتى

نۇر-سۇلتان. قازاقپارات - الەۋمەتتىك جاعدايى ناشارلاپ كەتكەن تۇرعىنداردىڭ جاعدايىن جاقسارتۋ - بۇگىنگى كۇننىڭ باستى مىندەتى بولىپ وتىر.

بۇل تۋرالى سەناتور دينار نوكەتايەۆا ءمالىم ەتتى، دەپ حابارلايدى قازاقپارات ءتىلشىسى.

ونىڭ ايتۋىنشا، جۇمىس ورىندارى كوپتەپ اشىلسا حالىقتىڭ جاعدايى جاقسارادى.

«قازاقستان پرەزيدەنتى قاسىم-جومارت توقايەۆتىڭ توراعالىعىمەن جاڭادان جاساقتالعان ۇكىمەتتىڭ كەڭەيتىلگەن وتىرىسىندا 2021-جىلعى الەۋمەتتىك-ەكونوميكالىق جوسپارىنىڭ قورىتىندىلارى تالقىلاندى. جەتىستىكتەر مەن كەمشىلىكتەر سارالانىپ، بارلىق ماسەلە جان-جاقتى قارالدى. پرەزيدەنت ۇكىمەتتىڭ قورىتىندى ەسەبى بويىنشا كوپتەگەن تاپسىرما بەردى. الەۋمەتتىك احۋال مەن حالىقتىڭ الەۋمەتتىك ماسەلەسى، حالىقتىڭ تابىسىنا بايلانىستى ءبىرقاتار مىندەتتەر العا قويىلدى. ونىڭ ىشىندە حالىقتىڭ تابىسىنداعى تەڭسىزدىكتەرگە بايلانىستى ايتقان ماسەلەلەرى وتە ورىندى ەكەنى اقيقات. ءبىزدىڭ ەلىمىزدە 1 ميلليوننان استام ادامنىڭ تابىسى جاڭاعى كەدەيشىلىك دەڭگەيىنەن تومەن بولىپ شىقتى. جەرگىلىكتى اكىمدەرگە الداعى ۋاقىتتا جۇمىس ورنىن اشىپ، حالىققا جاعداي جاساۋ، ميكرو، كىشى جانە ورتا بيزنەس اشۋعا تاپسىرما بەرىلدى. ونىڭ ىشىندە 10 مىڭ ادامعا جىلىنا 100 جۇمىس ورنىن اشۋ تاپسىرماسى دا ماڭىزدى بولىپ وتىر»، - دەدى د. نوكەتايەۆا.

ونىڭ ايتۋىنشا، ورتا جانە شاعىن بيزنەستى دامىتۋ ارقىلى حالىقتىڭ ءال-اۋقاتىن، تابىسىن ارتتىرۋ، تەڭگەرىمسىزدىكتى ازايتۋ ماسەلەسى شەشىلۋى ءتيىس.

«سوندىقتان دا مۇنى شىن مانىندە دە قۇپتايمىز. كەيىنگى ون جىلدىڭ ىشىندە الەۋمەتتىك جاعدايى ناشارلاپ كەتكەن تۇرعىنداردىڭ حال-احۋالىن جاقسارتۋ - بۇگىنگى كۇننىڭ باستى مىندەتى بولىپ وتىر»، - دەدى سەناتور.