17:02, 10 - اقپان 2022 | GMT +5
مەديتسينالىق قارسى كورسەتىلىمدەرى جوق استانالىقتارعا تولىق يممۋنيزاتسيادان ءوتۋ ۇسىنىلدى
نۇر- سۇلتان. قازاقپارات - نۇر- سۇلتان قالاسىنىڭ باس سانيتار دارىگەرى سارحات بەيسەنوۆا مەديتسينالىق قارسى كورسەتىلىمدەرى جوق ادامدارعا كوروناۆيرۋسقا قارسى تولىق ەگىلۋدى ۇسىندى، دەپ حابارلايدى قازاقپارات ءتىلشىسى.
«مەن مەديتسينالىق قارسى كورسەتىلىمدەرى جوق ادامدارعا تولىق يممۋنيزاتسيادان ءوتۋدى ۇسىنامىن. ۆاكسينا ءوزىڭىزدى قورعاعاننان بولەك، ۆيرۋستىڭ ودان ءارى تارالۋىن توقتاتۋ جانە بارلىق شەكتەۋلەردى ءبىرجولا جويۋ ءۇشىن ۇجىمدىق يممۋنيتەتتى دامىتۋعا مۇمكىندىك بەرەدى»، - دەدى سارحات بەيسەنوۆا ەلوردا اكىمدىگىندە ۇيىمداستىرىلعان بريفينگ بارىسىندا.
ونىڭ اتاپ وتۋىنشە، تەك ۇجىمدىق يممۋنيتەتكە قول جەتكىزۋ ارقىلى بارلىق شەكتەۋلەر تولىعىمەن الىنىپ تاستالعان ەۋروپانىڭ كەيبىر ەلدەرى وسىعان مىسال بولا الادى.
«وسى ەلدەردىڭ تاجىريبەسىنە قاراپ، ءبىز COVID-19-بەن كۇرەسۋدىڭ جانە قالىپتى ومىرگە ورالۋدىڭ ەڭ ءتيىمدى ءادىسى ۆاكسيناتسيا جانە ريەۆاكسيناتسيا ەكەنىن كورەمىز»، - دەدى باس سانيتارلىق دارىگەر.
اۆتور: مارلان جيەمباي
