الماتى تەرگەۋ يزولياتورىندا ادامداردى ازاپتايتىن جەرتولە راسىمەن بار ما
ينتەرنەتتە تاراعان وسى اقپاراتتىڭ شىنايىلىعىن تەكسەرۋ ءۇشىن بۇگىن اتالعان مەكەمەگە ارنايى تەكسەرىس جۇرگىزىلدى، دەپ حابارلايدى قازاقپارات ءتىلشىسى.
قاڭتار وقيعاسىنان كەيىن ب ا ق پەن الەۋمەتتىك جەلىلەردە الماتىداعى لا-155/18 مەكەمەسىنىڭ تەرگەۋ يزولياتورىندا قامالعانداردى ازاپتاۋعا ارنالعان جەرتولە جاساقتالعانى تۋرالى اقپارات جاريالانا باستادى. وسىعان وراي، الماتى قالاسى جانە الماتى وبلىسى بويىنشا قوعامدىق باقىلاۋ كوميسسياسى مەن الماتى قالاسى پروكۋراتۋراسىنىڭ وكىلدەرى اتالعان مەكەمەنىڭ تەرگەۋ يزولياتورىنا كەلىپ، تەكسەرىس جۇرگىزدى.
الماتى قالاسى بويىنشا قىلمىستىق اتقارۋ جۇيەسى (ق ا ج) دەپارتامەنتىنەن حابارلاعانداي، الماتى قالاسىنداعى تەرگەۋ يزولياتورى 1360 ادامعا ارنالعان. الايدا، قاڭتار ايىندا تەرگەۋ بارىسىنا قامالعانداردىڭ سانى 1400-دەن اسىپ كەتتى. قاڭتاردا قالىپتاسقان ەرەكشە جاعدايلارعا بايلانىستى 200 ورىندىق ۋاقىتشا وقشاۋلاۋ بلوگى اشىلدى.
«تەرگەۋ يزولياتورىنىڭ، رەجيمدىك كورپۋستاردىڭ جانە جەرتولە ءۇي- جايلارىنىڭ اۋماعىن ارالاۋ جۇزەگە اسىرىلدى. ق ا ج مەكەمەسىنىڭ اۋماعىندا ەكى قاباتتى اكىمشىلىك عيمارات جانە 4-5 قاباتتى 6 رەجيمدىك كورپۋس ورنالاسقان. اتالعان رەجيمدىك كورپۋستاردا كوممۋنيكاتسيالىق جۇيەلەر مەن جىلىتۋ توراپتارىنا ارنالعان جارتىلاي جەرتولە ءۇي- جايلارى بار. بۇل ءۇي- جايلارعا كىرۋ كورپۋستاردىڭ سىرتقى جاعىنان جۇزەگە اسىرىلادى. مەكەمەگە تۇسۋشىلەردى قابىلداۋ رەجيمدىك كورپۋستىڭ ءبىرىنشى قاباتىندا جۇرگىزىلەدى»، - دەدى ق ا ج دەپارتامەنتىنەن.
كورپۋستاردى ارالاۋ قورىتىندىسى بويىنشا ارنايى جابدىقتالعان كامەرالار مەن ءۇي- جايلار انىقتالعان جوق.
«ايتا كەتەيىك، كورىنەۋ جالعان اقپارات تاراتقانى ءۇشىن ق ر قىلمىستىق كودەكسىنىڭ 274-بابى بويىنشا قىلمىستىق جاۋاپكەرشىلىك كوزدەلگەن»، - دەپ ەسكەرتۋ جاسادى الماتى قالاسى بويىنشا قىلمىستىق اتقارۋ جۇيەسى (ق ا ج) دەپارتامەنتىندە.
ەسكە سالايىق، الماتىداعى لا-155/18 مەكەمەسىنىڭ تەرگەۋ يزولياتورىندا ازاپتاۋعا ارنالعان جەرتولە جوقتىعىن ق ر ىشكى ىستەر مينيسترلىگى دە ءمالىم ەتكەن ەدى.
اۆتور: دۋمان ارعىنگەلدى
