ماسەلەلەرمەن بەلسەندى كۇرەسۋمىز قاجەت جانە ولاردىڭ قارسىلىعى بولاتىندىعىن دا تۇسىنۋگە ءتيىسپىز - ايدوس سارىم
بۇل تۋرالى ق ر پارلامەنتى ءماجىلىسىنىڭ دەپۋتاتى ايدوس سارىم ايتتى، دەپ حابارلايدى قازاقپارات ءتىلشىسى.
«قوعامىمىزدا مىناداي پىكىر، مەنىڭ ويىمشا جاڭساق پىكىر بار. «ەگەر قازىر دەپۋتاتتاردى ماجوريتارلى ايماقتارمەن سايلايتىن بولساق، پارلامەنتتە 90 پايىز وپپوزيتسيا وكىلدەرى وتىرادى» دەگەن جاڭساق پىكىر ورىن الىپ وتىر. بۇل جالعان پىكىر. ونى كوردىك. مەن 2004 -جىلى «اق جول» پارتياسىنىڭ سايلاۋىن وتكىزگەن اداممىن. ءمۇيىزى قاراعايداي دەگەن كانديداتتارىمىز «ۇشىپ» كەتتى. اقشا، كاپيتال جۇرگەن كەزدە، ميللياردەرلەر تۇسكەن كەزدە حالىقتى تىكەلەي پاراعا ساتىپ الۋ مۇمكىندىكتەرى بولادى»، - دەيدى ايدوس سارىم.
ونىڭ پىكىرىنشە، ءماجىلىس جانە وبلىستىق ءماسليحاتتار دەپۋتاتتارى پارتيالىق جۇيەمەن سايلانا بەرگەن دۇرىس.
«ال سەنات ايماقتاردان تىكەلەي ماجوريتارلىق جۇيە ارقىلى سايلاناتىن بولسا، وندا وڭىرلەردىڭ ءۇنى دە رەسپۋبليكا دەڭگەيىندە، زاڭ شىعارۋشى ورگان ىشىندە شىعا باستايتىن سياقتى»، - دەدى ول ەلوردادا ۇيىمداستىرعان باسپا ءسوز ءماسليحاتى بارىسىندا.
سونىمەن قاتار ءماجىلىس دەپۋتاتى وكىنىشكە وراي قوعامىزدا جۇرتقا ءسوزىن تىڭداتا الاتىن تۇلعالاردىڭ ازايىپ بارا جاتقاندىعىن باسا ايتتى.
«اۆتوريتاريزم دەگەن نەگىزى ەلگە جاقسى ەمەس ەكەندىگىن تۇسىندىك. قازىر باستالعان ۇدەرىستەردى، تازارۋدى، ارىلۋدى اياعىنا دەيىن جەتكىزۋ كەرەك. بۇل ۇلكەن ماسەلە. شىنىن ايتۋ كەرەك، ايتقانعا عانا وڭاي. ادام رەتىندە دە، ءماجىلىس دەپۋتاتى رەتىندە پرەزيدەنتتىڭ شىن نيەتى بار ەكەنىنە سەنەمىن. پرەزيدەنتكە وڭاي ەمەس. پرەزيدەنتتىڭ سوڭعى قابىلداعان شەشىمدەرى - تاريحي شەشىمدەر. ءيا، «باتپانداپ كىرگەن نارسە، مىسقالداپ شىعادى» دەگەن قازاقتىڭ ماقالا بار. مەنىڭشە، ول جالعىز پرەزيدەنتتىڭ قولىنان كەلەتىن شارۋا ەمەس. بۇكىل قوعام بولىپ ارالاسۋىمىز، قاداعالاۋىمىز كەرەك. اسىرەسە، وسى اۆتوريتاريزمگە، مونوپوليزاتسياعا، وليگوپولياعا الىپ كەلگەن ماسەلەلەرمەن قوعام رەتىندە بەلسەندى كۇرەسۋمىز قاجەت جانە ولاردىڭ قارسىلىعى بولاتىندىعىن دا تۇسىنۋگە ءتيىسپىز»، - دەدى ايدوس سارىم.
