ايبەك پايايەۆ كامەلەتكە تولماعانداردىڭ تۇرمەسىن ءبىلىم مينيسترلىگىنىڭ قۇزىرىنا بەرۋدى ۇسىندى
بۇل ۇسىنىستى ول ق ر پالامەنت ماجىلىسىندە وتكەن «قازاقستان رەسپۋبليكاسىندا قىلمىستىق قۋدالاۋ جانە جازانى ورىنداۋ سالاسىنداعى ادام قۇقىقتارى تۋرالى» اتتى دوڭگەلەك ۇستەلدە ايتتى.
«ءبىزدىڭ ەلدەن باسقا الەمنىڭ ەش جەرىندە كامەلەتكە تولماعانداردىڭ تۇرمەسى جوق. ءتىپتى وسى ءسوزدىڭ ءوزى قۇلاققا تۇرپىدەي تيەدى. وسى قۇزىرەتتى ىشكى ىستەر مينيسترلىگىنەن الىپ، ءبىلىم جانە عىلىم مينيسترلىگىنە بەرۋگە بولماي ما؟ ءيا، كامەلەتكە تولماعان بولسا دا قىلمىس ىستەدى دەيىك. ءبىراق ونداي بۋىنمەن جۇمىس ىستەۋىمىز كەرەك قوي. دۇرىس، قالىپتى وڭالتۋ ورتالىعى بولۋ كەرەك. ال قازىر تاربيەلەۋدىڭ ورنىنا قاماۋدا قاداعالاپ قانا وتىرمىز. وسى ارقىلى-اق قوعامعا قاۋىپتى ادامداردى دايىنداپ جاتىرمىز»، - دەدى ءماجىلىس دەپۋتاتى ايبەك پايايەۆ.
بۇل سۇراققا قىلمىستىق اتقارۋ جۇيەسى كوميتەتى ءتوراعاسىنىڭ ورىنباسارى مەيرام ايۋبايەۆ جاۋاپ بەردى.
«قازىرگى كەزدە قىلمىستىق اتقارۋ جۇيەسىنە قارايتىن الماتى قالاسىنداعى ءبىر مەكەمە بار. ول جەردە كامەلەتكە تولماعاندار جازاسىن وتەپ جاتىر. بۇگىنگى تاڭدا وندا 59 بالا بار. ياعني، قازاقستان بويىنشا ءبىر مەكەمە بار. كامەلەتكە تولماعان قىزدار الماتى وبلىسىنداعى جاۋعاشتى ەلدى مەكەنىندەگى ايەلدەر جازاسىن وتەيتىن مەكەمەدە جازاسىن وتەۋى كەرەك. قازىر ول جەردە كامەلەتكە تولماعان ادام جوق»، - دەدى كوميتەت ءتوراعاسىنىڭ ورىنباسارى.
ايتۋىنشا، بۇل ماسەلەنىڭ قوعام تالقىسىنا تۇسكەنىنە 3-4 جىل بولعان.
«حالىقارالىق تاجىريبەلەردى تالقىلاپ جاتىرمىز. الماتى وبلىسىنىڭ اقتاس اۋىلىندا ارنايى پسيحاتريالىق اۋرۋحانا بار. ول جەردە كۇشەيتىلگەن كۇزەت جۇمىس ىستەيدى. عيماراتتىڭ سىرتىن پوليتسيا كۇزەتكەنىمەن، ىشىندە ناۋقاستاردى دارىگەرلەر عانا ەمدەيدى. ياعني، الدىمىزدا كامەلەتكە تولماعانداردىڭ تۇرمەسىن وڭالتۋ ورتالىعىنا اينالدىرۋدىڭ ناقتى مىسالى بار. وسى ءتاسىلدى ۇسىنىپ وتىرمىز. ءبىز سىرتقى پەريمەتردى كۇزەتەيىك، ال ىشىندە جاسوسپىرىمدەرمەن مۇعالىمدەر، پسيحولوگتار تاربيە جۇمىسىن وتكىزسىن دەپ وتىرمىز»، - دەدى ايبەك پايايەۆ.
اۆتور: ەسىمجان ناقتىباي
